Uquq qorçalayıcılar BMTa muracaat ettiler

Dünyada azatlıqtan marum etüv yerlerinde uzun müddetke apiske alınğan er yigirminci jurnalist Qırımdan kele. Uquq qorçalayıcılar bu malümatnı Birleşken Milletler Teşkilâtınıñ söz serbestligi mahsus maruzacısına muracaat etip, oña apiste yatqan jurnalistlerniñ vaziyetine diqqat ayırmağa tevsiye ettiler.

Jurnalistlerniñ aqlarını qoruv eyyetiniñ malümatını ve öz tedqiqatlarını talil etip, «Qırım esnası» uquq qorçalayıcı teşkilâtınıñ saytında böyle bir hulâsa derc etildi.

«Qırım esnası» öz muracaatında Rusiye apishanelerinde Qırımlı jurnalistlerge yapılğan basqı misallerini ketirdi — terbiye taqipleri, sert yanaşuv, diniy aqlarnıñ bozuluvı, em de tibbiy yardımnıñ minimal standartlarınıñ sistematik yoqluğı.

«Mahkeme qararından soñ cemiyetniñ, daa ziyade halqara müessiselerniñ, fikir bildirmek içün taqip etilgen qurbanlarnıñ taqdirine diqqatı az qaldı. Meselâ, keçenlerde Birleşken Milletler Teşkilâtınıñ söz serbestligi meseleleri mahsus maruzacısı, Qırım jurnalisti İrına Danılovıçnıñ taqip etilüvine dair "Sıñırsız mühbirler"niñ muracaatını körmemezlikke urdı. BMTnıñ Mahsus maruzacısına apiste yatqan jurnalistlerniñ meselelerine daa çoq diqqat ayırmağa tevsiye ettik, şu cümleden apishanelerde olarnıñ aqları bozulğanı aqqında bildirüvlerge cevap bermege mecburiyetini qayd ettik», — dep qayd etti «Qırım esnası».

Tavsiyeler, 2026-2029 seneleri içün BMTnıñ mahsus maruzacınıñ vazifesiniñ strategik prioritetleriniñ işlep çıqarılmasına ait. Qabaatlayıcı protsedura çerçivesinde uquq qorçalayıcılar «zorbalıqnen ğayıp olğan, qanunsız taqip etilgen ve jurnalistlerge nisbeten apishanede sert davranılğan şahıslarnıñ halqara cedvelini meydanğa ketirmek içün subet başlamağa» çağırdılar.

Hatırlatamız ki, «2026 senesi matbuat serbestligi içün eñ ciddiy telükeler» maruzasında Jurnalistlerniñ aqlarını qorçalav eyyetiniñ qayd etkenine köre, dünya boyunca apishanelerde 330 media hadimi buluna. Olardan 61%-i «devlet hainligi» ve diger ciddiy devlet cinayetleri boyunca qabaatlandı ya da mahküm etildi.

«Qırım esnası»nıñ malümatına köre, Rusiyeniñ apishanelerinde 17 Qırımlı jurnalist tutula, olardan 16-sı «terrorizm» ya da «diversiya» qabaatlavı boyunca mahküm etildi. Bu raqamlarnı birleştirsek, dünyada apiske alınğan jurnalistlerniñ 5,15%-i Qırım jurnalistleridir.

Читати ще