İşğalciler işğal etilgen yarımadanıñ eki sakinesine — ana ve qızına — dair sahte «devlet hainligi» davasını sözde «Qırım yuqarı mahkemesi»ne yolladılar. Uquq qorçalayıcılarnıñ malümatına köre, söz 70 yaşındaki Anna ve 51 yaşındaki Oksana Sotsenko aqqında yürsetile bilir.
İlk küz ayınıñ 4-nde işğalli «Qırım prokurorlığı» bunı bildirdi.
«Taqiqatnıñ versiyasına köre, qabaatlanğanlardan biri Ukrayina Havfsızlıq Hızmetiniñ hadiminen alâqağa keçti, soñra öz qanunğa qarşı faaliyetine 1975 senesi doğğan qızını celp etti. Kuratorlarnıñ emirlerine köre, olar SIM-kartalarnı satın ala ediler, bundan ğayrı, qadınlardan biri arbiy hızmetçilerniñ maşnalarınıñ fotoresimlerini çıqara edi», — dep qayd etildi haberde.
İşğalciler qanunsız tutulğan qadınlarnıñ adlarını aytmaylar.
Evel uquq qorçalayıcı ve Qırımtatar Resurs Merkeziniñ idarecisi Zarema Bariyeva bildirgen edi ki, Qırımda işğalciler 2025 senesi qara qış ayınıñ 29-nda, Qurman (Pervomayske) rayonından olğan 70 yaşındaki Anna Sotsenkonı qızı Oksana Sotsenkonen beraber (1975 senesi doğğan, işğalcilerniñ haberinde qayd etilgenine köre — muar.) qanunsız tuttılar.
O zaman quvetçiler olarnıñ dairesini qanunsız olaraq tinttiler. Sadece 9 ay soñ, 2025 senesi orta küz ayında, qadınlarnıñ qanunsız şekilde «devlet hainligi»nde qabaatlanğanları ve Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ 1-nci taqiqat izolâtorında tutulğanları belli oldı.
«Tribunal. Qırım epizodı» uquq qorçalayıcı leyhasınıñ, işğal etilgen yarımadanıñ cezalandıruv sistemasındaki menbasına atıf etip bildirgenine köre, qadınlar uzun müddet tolu izolâtsiyada bulundılar, soñra ise «devlet hainligi»nde qabaatlandılar.
70 yaşındaki Anna Sotsenkonıñ bir qaç hronik hastalığı bar, qızı Oksana Sotsenkonıñ ise on yaşındaki saqatlı qız balası bar. Buña baqmadan, olarnı bulunğan yerleri aqqında resmiy malümat bermeden, tışqı dünyanen alâqasız doquz aydan ziyade tuttılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
