Rusiyeniñ Cenübiy bölge arbiy mahkemesi «beşinci Bağçasaray gruppası» davasında imayeciniñ 52 muracaatını red etti. Arman ayınıñ 31-nde mahkeme kollegiyasında «mahkemeci» Roman Saprunov qarar qabul etti.
Siyasiy mabüs Abdulmecit Seitumerovnıñ apayı Amina içtimaiy ağlarda bunı bildirdi.
«Mahkeme, imayeci tarafnıñ daa evel bergen muracaatlarını baqıp çıqtı. Keçken oturışta prokuror 15 daqqa içinde bütün muracaatlarnıñ red etilmek kerekligine dair öz fikrini bildirdi. Neticesinde, bugün — aman-aman aynı 15 daqqa içinde — mahkeme BÜTÜN (!) muracaatlarnı red etti. Olarnıñ sayısı 50den çoq edi», — dep qayd etildi haberde.
Suspilne Qırımnıñ uquq qorçalayıcılar arasında olğan menbalarınıñ aytqanına köre, Saprunov bir sıra ekspertizanı — ruhiy-lingvistik, dinşınaslıq, daktiloskopik ve fonoskopik ekspertizanı keçirmege razı olmadı.
O, cinaiy davadan yasaq etilgen delillerni çıqarmaq ve şaatlarnı çağırmaq muracaatlarını da qanaatlendirmedi.
Mahkeme, imayeci tarafnıñ muracaatları sebepsiz olğanını qayd etti. Bundan da ğayrı, o, davanıñ delilleriniñ qanuniyligini, materiallarnıñ resmiyleştirilmesinde bozuluvlarnıñ olmağanını, şahıslarnıñ sorğusı ve tahqiqat basamağında qabaatlanğanlarnıñ şikâyetleriniñ olmağanını qayd etti.
Amina Seitumerovanıñ evel qayd etkenine köre, prokuror «qabaatlavnıñ esasına ait» olğan bütün şikâyetlerni red etti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
