İlk küz ayınıñ 2-6 künleri Kıyivde Ukrainian Fashion Week SS27 keçirilecek. 50 ukrayin moda brendi öz kolleksiyalarını taqdim etecek. Olarnıñ arasında qırımtatar dizayneri Elvira Usmanova da bulunacaq. O, ukrayin moda brendleriniñ öz kolleksiyalarını satıcılar, media ve ortaqlarına köstergenleri Trade Showda iştirak etecek.
O, öz Instagram saifesinde bunı bildirdi.
«Bu mevsim el emegine, zemaneviy dizaynda yañı şekilni alğan ananeviy tehnikalarğa bağışlanğan. Bizim içün bu mevzu hususan yaqındır. Nağış, ELVIRA USMANOVAnıñ yaratıcı tiliniñ yönelişlerinden biridir. Etnik mevzuğa muracaat etkenimiz kiyimlerde ukrayin medeniy kodları ve dizaynerniñ qırımtatar köklerine mahusus yer berile. Kodlar, olarnı brend zemaneviy dizayn tilinde nazik şekilde yañıdan tasvir ete... Bu, öz köklerini saqlağan, olarnı yañıdan tasvir etken ve kelecekni işançlı şekilde şekillendirgen zemaneviy ukrayin modası tarihınıñ bir qısmı olmaq imkânıdır», — dep qayd etti Usmanova.
O, Suspilne Qırımğa añlattı ki, şimdi taqım elnen nağış ve bezemelerni özünde saqlağan kolleksiyanı bitirmek üzerinde faal çalışa.
«Elbette, eyecanlanamız, amma inanamız ki, er şey yahşı olacaq ve er şey, er kiyim begenilecek. Bu, brendnen tanışuv formatı olacaq, tam bizimiz yaratqanımız şey, ve atta bir qaç yañı kiyim olacaq, olarnı ilk kere taqdim etecekmiz.. Men kiyimlerni, bütün resimlerni, eskizlerni, nağış içün resimlerni özüm yaratam. Men, er bir kiyim artında ne qadar saat, ne qadar sevgi ve emek qoyulğanını bilem. Şunıñ içün beklentilerim daa müsbet. Biz üç işhanenen işbirlik etemiz, em de bizim usta-nağışçılarımız Ukrayina boyunca [çalışalar]», — dedi Usmanova.
Onıñ sözlerine köre, Trade Show formatı, musafirlerniñ brendniñ kiyimleri ve bezeklernen vastasız tanışuvını, kiyip baqmaq ve sipariş etmek imkânını közde tuta. Dizayner, canlı alâqanıñ müimligini qayd etti, çünki ictimaiy ağlar er zaman kiyimlerniñ keyfiyetini ve atmosferasını yaratamaz.
«Bizim içün pek muim, bütün insanlar tam ne yaratqanımıznı, keyfiyetimizniñ ne olğanını, işlerimizniñ ne olğanını mümkün olğan qadar körsünler. Men er kesnen laf etecegim ve er bir şey aqqında, meni kiyimlerimni yaratmağa ilhamlandırğan şey aqqında añlatacağım», — dep qayd etti Usmanova.
Evel Ukrainian Fashion Weekniñ teşkilât eyyeti reisi İrına Danılevska, Ukrayina müstaqilliginiñ 35 yıllığı munasebetinen, Prezident Volodımır Zelenskiyden devlet mükâfatını aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
