İşğal etilgen Qırım Yuqarı mahkemesine «devlet hainligi»nde qabaatlanğan Qırım sakinine qarşı cinaiy dava yollanıldı.
Arman ayınıñ 12-de işğalli Qırım prokurorlığı Telegramda bunı bildirdi.
«Ukrayinağa qarşı mahsus arbiy operatsiyanıñ (Rusiye böylece Ukrayinağa qarşı tolu miqyaslı istilânı adlandıra — muar.) keçirilmesine qarşı çıqqan 30 yaşındaki Krasnoperekopsk sakini (şimdi Yañı Qapu — muar.), Ukrayina Baş istihbarat idaresiniñ vekili ile bağ qurdı. O, ava mudafaası sistemasını ve Rusiye Federatsiyası Silâlı quvetleriniñ hadimlerini nezaret ete edi», — dep aytıla haberde.
İşğalli müessise, Qırım sakininiñ toplağanı bütün malümatnı «yabancı devletniñ vekili»ne messencerde yollağanını qoştı.
Bundan evel işğalciler 48 yaşındaki Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ sakinini tuttılar ve oña qarşı Rusiye Cinaiy qanunnamesiniñ 205.2-nci maddesiniñ 2-nci qısmına «Terroristik faaliyetke açıq çağıruvlar, terrorizmni açıq aqlavlar ya da terrorizm teşviqatı» binaen cinaiy dava açtılar.
Hatırlatamız ki, keçken aftalarda işğal etilgen Qırımda Yevhen Şvedge qarşı yañı cinaiy dava, tutulması ve içtimaiy ağlarda qaldırğanı tefsirler içün para cezaları belli oldı, bundan ğayrı işğalciler Crimean Tatar Foundationnı «istenilmegen» olaraq tanıdılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
