Arman ayınıñ 4-5 künleri Ukrayina Silâlı quvetleriniñ İnsansız sistemalar quvetleri vaqtınca işğal etilgen Ukrayina topraqlarında, hususan, Qırımda, daa 13 energetik obyektiniñ zarar körgenini bildirdi.
İSQniñ komandanı Robert Brovdi («Madâr») bu aqqında haber etti.
Onıñ aytqanına köre, umumen oraq ayınıñ 1-den arman ayınıñ 5-ke qadar İSQniñ bölükleri vaqtınca işğal etilgen topraqlardaki 201 energetik noqtasına ücüm etti.
İSQniñ bildirgeni zarar körgen obyektler arasında — işğal etilgen Qırımda «Nataşıne» gaz bölüv stantsiyası, Donetsk, Zaporijjâ, Herson ve Luğansk vilâyetlerinde 750, 330, 150 ve 110 kV küçlü stantsiyalar.
İSQniñ bildirgenine köre, zarar körgen obyektler işğal etilgen Mariupol, Melitopol, Ğeniçesk, Berdânsk, Zugres, Prımorskıy Posad ve diger meskün yerlerniñ elektrik teminatını temin ete edi.
Hatırlatamız ki, arman ayınıñ 5-ne keçer gecesi Ukrayina mudafaa quvetleri duşmannıñ işğal etilgen Qırımnıñ İşün köyündeki maddiy-tehnikiy vastaları anbarına ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
