İşğal etilgen Qırımnıñ şarqiy qısmındaki 30 köy suvsız qaldı. İşğalciler bunı ağ bozulmasınen añlattılar. Bundan da ğayrı, bazı bölgeler elektriksiz qaldı.
RİA «Novosti Krım», işğalli «Krımenergo»ğa atıf etip, bunı bildirdi.
Qaysı meskün yerler aqqında söz yürsetilgeni belli degil.
«Tış tesirinden eñ çoq zarar körgen rayonlarda elektrik teminatınıñ ğayrıdan tiklenmesi, elektrik ağınıñ imkânlarına ve "Krımenergo" müessiseleriniñ ve elektrik ağınıñ zarar körgen obyektleriniñ işke azırlığına, em de energiya menbası olğan magistral elektrik ağına bağlıdır», — dep qayd etildi haberde.
Saat 12:00-ge qadar Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) ekinci ağında elektrik söndürildi.
Arman ayınıñ 5-ne keçer gecesi işğal etilgen Qırımda patlavlar oldı. Hususan, Sevastopol (Aqyar) ve Keriç şeerlerinde, dep nezaret kanlları haber etti.
Arman ayınıñ 4-nde saat 23:00-da «Ateş» arbiy-partizan areketi Sevastopolğa (Aqyarğa) ücüm aqqında bildirdi.
Bundan soñ RİA «Novosti Krım» ,işğalli «Sevastopolenergo»ğa esaslanıp, şeerniñ eki rayonında fevqulâde söndürüvler aqqında bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
