Qırımtatar İrfan Mirzoyev arman ayınıñ 1-2 künleri Litvaniyada keçirilgen DRUSKININKAI CUP, yunan-roma küreşi halqara turnirinde 77 kg ağırlığında altın medal qazandı.
Ukrayina yunan-roma küreşi federatsiyasınıñ Instagram saifesinde bu aqqında haber etildi.
DRUSKININKAI CUP — arman ayınıñ 1-2 künleri Druskininkay şeerinde (Litvaniya) olıp keçken ve bir çoq Avropa memleketinden küçlü küreşçilerni toplağan ananeviy halqara turnirdir. Qırımtatar İrfan Mirzoyev 77 kg ağırlığında altın medal qazandı.
«Yarışlar dünya çempionatına azırlıqnıñ müim basamağı oldı ve bir çoq parlaq ve uzlaşmaz küreş taqdim etti. Sportçularımız ğayet parlaq küreş, yüksek seviyede ustalıq kösterdiler ve bir sıra mukâfat qazandılar», — dep bildirdi Ukrayina yunan-roma küreşi federatsiyası.
İrfan — qırımtatar, tolu miqyaslı istilâ başlanğan soñ yarımadanı terk etti, şimdi Poltava vilâyeti ve Qırımnı temsil ete. Daa evel Suspilne Qırımğa bergen intervyusında o, dünya çempionatına, soñra ise Olimpiya oyunlarına azırlanğanını ayttı.
Mirzoyev dört yıl evelsi, 17 yaşında olğanda, Ukrayinanı halqara yarışlarda temsil etmek aqqını qazandı. Dünya ve Avropa çempionatlarınıñ bir qaç kere ğalibi edi.
İrfan içün küreş aile tarihıdır. Onıñ qorantasında bu sport nesilden nesilge keçe edi. İşte bu sebepten, sportçu balalıqtan berli özüne büyük maqsat qoyğan.
«Menim qorantamda er kes küreşnen oğraşa edi. Men balalıqtan küreşnen oğraşam. Başlağanda maqsadım — Olimpiya oyunlarına barıp, altın qazanmaq edi», — dep tarif etti sportçu.
İrfan Qırımda doğdı. «Qırım — menim vatanımdır», — dey o. Tolu miqyaslı istilâdan soñ, idmancı Lenur Temirovnen beraber qıtaiy Ukrayinağa köçti.
«Bugün biz Poltava vilâyetini temsil etemiz ve aynı zamanda tuvğan Qırımımız — Qırım Muhtar Cumhuriyetiniñ sport küreşi federatsiyasını temsil etemiz. Kim olğanımıznı iç bir vaqıt unutmaymız. Bütün dünya bilsin ki, Qırım bar, Qırım sportçuları bar», — dep qayd etti Lenur Temirov.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
