Rusiye mahkemesi dörtünci kere Qırım siyasiy mabüsi, «Hizb ut-Tahrir» davasınıñ eñ büyük gruppasınıñ iştirakçisi Tofik Abdulgaziyevniñ, apiste tutulmasına mania olğan hastalıqlar cedveline kirgen ağır hastalıqlar sebebinden azat etilmesi aqqında muracaatını başqa künge qaldırdı. Qırımtatarnıñ miy kanseri bar.
Oraq ayınıñ 31-nde onıñ apayı Aliye Abdulgaziyeva Facebookta bunı bildirdi.
Onıñ aytqanına köre, başta mahkeme yañı ekspertizanı talap etti, soñra mahkemeci tatilge çıqtı, şimdi ise, evelki ekspertizalar «eski» olğanı aytıla. Nevbetteki oturış ilk küz ayınıñ 22-ne belgilendi.
Aliye Abdulgaziyeva, aqayınıñ Çelâbinsk apishanesiniñ hastahanesinde tutulğanını tarif etti, anda ekimler, miydeki yañı şişikniñ biopsiyası içün qafa tasınıñ trepanatsiyasını talap eteler. Qırımtatar bu ameliyatnı yapmağa istemey, çünki ekimlerniñ aytqanlarına köre, o, ölümge ya da bütünley yaramaylaşuvğa ketire bile. İmayeci, mahkeme oturışında, onıñ yalıñız telükeli tedbirlerden vazgeçkenini, umumen tedaviylenüvden vazgeçmegenini qayd etti.
Siyasiy mabüsniñ apayı qayd etti ki, 2026 senesi kiçik ayda keçirilgen ilk ekspertiza, Abdulgaziyevniñ kritik sağlıq vaziyeti sebebinden onıñ acele azat etilmesi kerek olğanını kösterdi. Amma mahkeme, tibbiy ekspertizanıñ neticelerine qulaq asmayıp, davanı er seferinde başqa vaqıtqa qaldıra.
«Mahkeme davalarnı bir daa uzatıp, ne maqsatqa irişe? Yaşam ve ölüm arasında turğan insandan ne beklenile? Aqayım içün er şey açıq-aydın, ve o er angi qararnı qabul etmege azır. Er bir subetimizde o biznen vedalaşa. Körüşmege rica ete. Men bunıñnen razı degilim. Ve Tofik Abdulaziyevniñ vaziyetine dair meseleler acele ve kerekli şekilde baqılmasını talap etem! Nevbetteki oturış ilk küz ayınıñ 22-ne qaldırıldı. Aqayımnıñ endi yaşamaq ümüti olmağan künge», — dep qayd etti Aliye Abdulgaziyeva.
Daa evel o, Rusiye mahkemesi onıñ azat etilmesi boyunca davanı bilerek uzatqanını qayd etken edi.
2024 senesi saban ayından başlap, miyinde zararlı şişiknen hastalanğan qırımtatar Çelâbinskteki 3-nci apishane verem hastahanesinde buluna edi. Bu yıl oraq ayında onı bir kişilik kameradan tedaviylev bölügine avuştırdılar. Lâkin sağlığı fenalaşa.
Onkologiya hastalığından ğayrı, Abdulgaziyevge kökrek içindeki limfa tüyümleriniñ zarar körgenini ve tarqalğan aqciger veremi hastalığı diagnozı qoyulğan edi.
Oraq ayında Ukrayina Yuqarı Şurasınıñ insan aqları vekâletlisi Dmıtro Lubinets, Qırım siyasiy mabüsi Tofik Abdulgaziyevniñ miy kanseri teşkerilgenine dair Türkiye zenaatdaşına muracaat etti. Rusiye mahkemesi onıñ azat etilmesi boyunca davanı devam ettire. Ombudsmannıñ aytqanına köre, Ukrayina Qırımdan bütün siyasiy mabüslerni qaytarmaq içün areket ete.
Bundan evel Prezidentniñ Qırım Muhtar Cumhuriyetindeki Daimiy Temsilcisi Olğa Kurışko Qırım platforması Mütehassıs ağınıñ beşinci halqara forumında Ukrayina «er bir qısmı, er bir insan aqqında hatırlay ve bütün devletimiz ve onıñ er bir ayırılmaz qısmı içün adalet oğrunda küreşkeni»ni bildirdi.
Büyük Britaniya vekâletlisi Şarlotta Süren aynı şu tedbirde işğal etilgen Qırımda insan aqları vaziyeti, şu cümleden qırımtatarlarnıñ taqip etilüvi, söz ve din serbestliginiñ sıñırlanması, qanunsız tutuvlar ve siyasiy sebeplerden qabaatlavlar «pek qasevetlendirici» olğanını bildirdi.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
