Serğiy Lıhomanov Qırımdan etap etilgende ğayıp oldı

Eki aydan berli siyasiy mabüs Serğiy Lıhomanovnıñ bulunğan yeri aqqında iç bir malümat yoq. Qırımğa qanunsız sürgün etilgen soñ tuvğanları onıñ aqqında malümat almağa toqtadı.

Qırımtatar Resurs Merkezine siyasiy mabüslerniñ yaqınları bunı bildirdiler.

Ukrayina vatandaşı Serğiy Lihomanov 2023 senesi ilk qış ayınıñ soñunda işğal etilgen Sevastopolda (Aqyarda) tutuldı. 2024 senesi mayıs ayında «mahkeme» onı qanunsız şekilde «patlayıcı taşıması ve saqlavı»nda qabaatlap, 5 yılğa üküm etti. 2025 senesi orta küz ayınıñ 8-nde Rusiye mahkemesi daa bir «devlet hainligi»nde qabaatlap, 15 yıllıq apis cezasına mahküm etti.

«Malüm olğan malümatqa köre, 2026 senesi sabannıñ 4-ne qadar Serğiy Lıhomanov Tağanrognıñ 2-ndi SİZOsında bulunğan edi, andan onı etap etip, siyasiy mabüs Ruslan Şvets-Çornıyğa qarşı uydurılğan dava çerçivesinde «taqiqat işlerinde ve iştirake etmesi ve şaatlıq bermesi içün» çiçekniñ 9-nda Simferopolnıñ (Aqmescitniñ) 2-nci SİZOsına alıp ketken ediler«, — dep QRM ayttı.

Çiçekniñ 17-nde qorantasından Serğiyniñ tek telefon araması oldı, o, Krasnodarnıñ 1-nci SİZOsında bulunğanını bildirdi. Bundan soñra bağ kesildi.

Mayısnıñ 11-nde tuvğanları Serğiy Lıhomanovnıñ Saratovda bulunğanı aqqında cevap aldılar. Aynı vaqıtta belli oldı ki, onıñ soñ noqtası «Vladimir merkezi» olacaq, anda o qanunsız şekilde tayinlengen cezasını çekecek. Bundan soñ Serğiy Lıhomanovnıñ bulunğan yeri aqqında iç bir malümat yoq.

Uquq qorçalayıcılarnıñ malümatına köre, Serğiy Lıhomanovnıñ hronik hastalıqları bar, büyrek taşları büyüktir, bu sebepten qoşma teşkerüv kerek. Bundan da ğayrı, onıñ sağlığınıñ yañı meselesi peyda oldı, amma o, teşkerüv neticeleri aqqında iç bir vaqıt haber almadı.

«Sağlıq vaziyeti sebebinden Serğiy Lıhomanov devamlı tedaviylev, mahsus aşayt ve tibbiy ilâclarğa muhtac, lâkin apishanelerde kerekli tibbiy yardımnı almay. Bundan evel siyasiy mabüsniñ alı fenalaşqanı aqqında soy-soplarına haber ete ediler ve kerekli ilâclarnı bermege rica ete ediler. "Qırım siyasiy mabüsi Serğiy Lıhomanovnıñ etap etilmesi vaqtında bulunğan yeri aqqında bir de bir malümatnıñ olmaması ciddiy qasevet doğura, hususan onıñ ağır sağlıq vaziyetini köz ögüne alsaq", — dep qayd etti QRM.

Читати ще