UNESCOTasil, ilim ve medeniyet meseleleri Birleşken Milletler Teşkilâtı, "Hersones qadimiy şeeri ve onıñ horası" dünya mirası obyektini Telükede olğan dünya mirası obyektleri cedveline kirsetti.
Qarar bugün, oraq ayınıñ 23-nde, UNESCO Dünya mirası eyyetiniñ 48-inci sessiyasında qabul etildi, dep bildirdi Ukrayina Tış işler nazirligi.
"Bizler bu qararnı alğışlayıq. Rusiye tarafından vaqtınca işğal etilgen Ukrayinanıñ Qırımında yerleşken bu obyekt Rusiye işğalli akimiyeti tarafından zarar körgen ve viran etilgen", — dep qayd etti Ukrayina Tış işler nazirliginiñ yolbaşçısı Andriy Sıbiğa.
Qarar halqara toplulıqnı vaqtınca işğal etilgen Qırımdan kelgen medeniy degerliklerniñ qanunsız ticaretini toqtatmaq içün işbirlikni quvetleştirmege çağıra.
Vesiqalaştırılğan Rusiyeniñ işğal etilgen yarımadadaki bozuvları bu qararnıñ temeli oldı: qanunsız arheologik qazma işleri, abideniñ toprağında ve onıñ qoruv zonalarında büyük qurucılıq, arheologik kontekstniñ yoq etilmesi ve medeniy qıymetlerniñ qanunsız avuştırılması, dep añlattı Ukrayina Prezidentiniñ Qırım MCdeki Temsilciligi.
Muzakere esnasında Ukrayina tarafını açıqtan-açıq Poloniya, Çehiya ve İsviçre vekilleri desteklediler.
UNESCO Qırımnıñ diger medeniy miras obyektleriniñ qoruvını temin etmege çağırdı: Bağçasaraydaki Hansaray, Qırım Gotiyası qoba şeerleri, Qırım astrofizik observatoriyası ve Sudaq qalesi.
Hersones — Şimaliy Qara deñiz yalısındaki qadimiy yunan meskün yeri. VI asırda qadimiy yunanlar tarafından qurulğan şeer, bölgeniñ müim siyasiy, iqtisadiy ve medeniy merkezi oldı. 2013 senesi arheologik abide UNESCO Dünya mirası cedveline kirsetildi. Hersones ve onıñ horası aman-aman bütün Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) toprağını qaplap alalar.
Bundan evel Suspilne Qırım işğalli "Qırım medeniyet nazirligi" Hersones qoruğınıñ toprağında mesken qurucılığına izin bergenini bildirdi. Avropa Birliginiñ Şurası Rusiyege qarşı 17-nci sanktsiyalar paketini tasdıqladı. Şu cümleden, Qırımda medeniy mirasnıñ hırsızlanmasına qarşı sıñırlavlarnı kirsetti. Cedvelge Sevastopoldaki (Aqyardaki) "Hersones" müzey-qoruğınıñ işğalli müdiri Olena Morozova kirdi.
Rusiye arheologlarınıñ Qırımnıñ medeniy mirasını nasıl hırsızlağanları ve onı teşviqat aletine çevirgenleri aqqında Suspilne Qırımnıñ maqalesinde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
