İşğalli Qırım Medeniyet nazirligi "Hersones" qoruğınıñ toprağında mesken qurucılığına izin berdi.
İşğalli FortPost neşiri bunı bildirdi. 12 şahsiy qurucılıq topraq damartısı aqqında söz yürsetile.
Evel bu yerlerde qurucılıq yasaq etilgen edi.
"Evelki qoruv rejiminde kapital qurucılığı kerçekten planlaştırılmağan edi, amma Medeniyet nazirliginiñ buyruğı deñiştirilgen soñ, topraqlar qurucılıqqa kerçek yol aldı — yükseklik ve yeşilliknen bağlı sıñırlavlarnen. Bütün 12 bölük "Hersones Qadimiy şeeri, Çembalo ve Kalamita qaleleri" federal abidesi çerçivesinde yerleşe", — dep haberde qayd etildi.
12 bölükten dörtü "Sarandinakina ve Delagard balkaları arasındaki suv bölüginde sıñır divarları sisteması" arheologik miras obyektiniñ içinde yerleşe, daa ekisi — qısmen. Daa bir bölük, milâttan soñ birinci asırnıñ "Qaya mezarlığı" arheologik miras obyektinen qısmen bağlı, dep FortPost yazdı. İşğalli Qırım Medeniyet nazirligi 2025 senesiniñ soñunda qurucılıq talaplarını yımşattı.
Hatırlatamız ki, ruslar işğal etilgen Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad daki) Balıqlava rayonında "Laspi" qoruğını quralar. Bugün deñiz kenarında ve yalıda qurucılar ağaçtan yapılar qurıp, ağaçlar arasında qurulışlar quralar. Qoruq yerinde tabiatqa ketirilgen zarar aqqında ForPost Sevastopol medyası da yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
