Kıyiv mahkemesi yarımada işğal etilgen soñ Qırımğa köçken ve 2024 senesinden rusiye ordusında Ukrayinağa qarşı cenkleşken Stanislav Staşevskıy içün apis şeklinde qorçalayıcı tedbir sayladı.
Suspilne Qırım mühbiri mahkeme zalından bu aqqında haber berdi.
Ukrayin taqiqatınıñ malümatına köre, işğal etilgen Qırımda olğanda qabaatlanğan adam RF vatandaşı pasportını aldı, 2024 senesi saban ayınıñ 29-nda rusiye ordusınen üç yılğa añlaşma imzaladı. Herson vilâyetindeki arbiy areketlerde iştirak ete edi.
Dava mahkemecisi Kuksa Oleksandr mahkeme oturışı vaqtında haber berdi ki, olarnıñ malümatına köre, Staşevskıy istihbaratçı olıp, 2024 senesi boş aydan başlap ise dron operatorı olıp hızmet ete edi. 2o25 senesi orta küz ayında taqiqat oña devlet hainliginde şübe bildirdi ve qıdıruvğa ilân etti.
Mahkeme zalında Staşevskıy jurnalistlerge añlattı ki, onıñ deñiştirüv cedveline kirsetilecegine ümüt ete. O ayttı ki, Rusiyede doğdı, balalıqta ana-babasınen Sumı vilâyetine köçti ve anda ukrayin pasportını aldı. 2023 senesi qara qış ayınıñ 30-nda rusiye vatandaşlığını aldı. Ukrayinağa qarşı arbiy areketlerde iştirak etken soñ ne içün Litvaniya cumhuriyetine ketkenini qarma-qarışıq añlata ve tatil vaqtında rusiye arbiy hızmetçisi olaraq ketti.
"Men Ukrayina ve Rusiyeden sığınaq istedim. Litvaniya migratsiya bölügi men apiske aldı. Menim Litvaniyanıñ milliy havfsızlığı içün telüke olğanımnı ayttı. Men olarğa açıq şekilde er şeyni añlattım ve birinciden olar maña onı berdiler, men 2026 senesi qara qış ayında alacağım vesiqalarnı bekley edim", — dep añlattı Staşevskıy.
Ukrayina Havfsızlıq hızmetiniñ evel bildirgeni malümatqa köre, 2025 senesi boş ayda ukrayinalı Litvaniyalı uquq qorçalayıcılar sıñırda tuttılar. Mahsus hızmet bildirdi ki, o, Hersonğa ücüm etici dronlarnı uçura edi.
Taqiqatnıñ malümatına köre, o, ateş mevamından qaçtı, bundan soñ ukrayin qaçağı olaraq Avropa Birligine kirmege tırıştı.
"AB toprağında qabaatlanğan adam öz ukrayin pasportı vastasınen qaçaq statusını resmiyleştirdi ve tınçladı. Litvaniya işdeşleri sıñırda askerni tuttılar ve adalet yerine ketirmesi içün ukrayin tarafına berdiler", — dep qoştı UHH.
O, mülkü müsadere etilip, ayatınıñ soñuna qadar mahküm etile bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
