Oraq ayınıñ 21-nde "Qırımtatar Resurs Merkezi" 2026 senesiniñ birinci yarısında işğal etilgen Qırımda insan aqlarınıñ bozuluvı talilini taqdim etti. Uquq qorçalayıcılarnıñ malümatına köre, işğalli akimiyet yarımada sakinlerini sıq-sıq "terrorizm", "devlet hainligi" ve "casuslıq" kibi sahte qabaatlavlarnen taqip ete edi.
Taqdimatnıñ yayını QRMniñ Facebook saifesinde keçti.
2026 senesiniñ birinci yarısında uquq qorçalayıcılar Qırımda 11 tintüvni qayd etti, olardan 2-si qırımtatarlarğa qarşı edi. Bundan ğayrı, 128 qanunsız apis aqqında haber etildi, olardan 37-si qırımtatar halqınıñ vekillerine nisbeten. Daa üç adam ğayıp oldı.
"2026 senesiniñ birinci yarısında 47 yaqalanuv oldı, 3-ü qırımtatarlarğa qarşı. 2025 senesiniñ aynı müddetinde 65 böyle yaqalanuv qayd etildi, 15 — qırımtatarlarğa nisbeten, 2024 senesi — 71 ve 21 Bu raqamlarnı körgenimizde, 2026 senesi apiske alınğanlarnıñ sayısı bayağı eksilgenini tüşünemiz, amma insanlar yaqınları ya da soy-sopları apiske alınğanı aqqında daa az malümat bereler ve belki de bir ay, doquz aydan soñ bilecekmiz", — dep añlattı QRMniñ idare reisi Eskender Bariyev.
O, siyasiy mabüslerniñ soy-soplarını, halqara uquq qorçalayıcılarnı celp etmek içün soy-soplarınıñ tutulması ya da ğayıp oluvı aqqında haber etmege çağırdı.
2026 senesi Qırımda insanlarnı terroristik ücümlerRF CQniñ 205.2-nci maddesiniñ 1-nci qısmıde qabaatlap ya da olarğa açıq çağıruvlar RF CQniñ 205.3-nci maddesiyapıp tutqanlar.
Diniy taqip aqqında aytsaq, 9 adise qayd etildi — 7-si "Yehova şaatları" ve 2- si uydurılğan "Hizb ut-Tahrir davası".
"Hizb ut-Tahrir davasınıñ tertibi devam ete, lâkin sayısı eksilmekte. Bizge bütün malümat berilmegenini tüşünemiz, amma onı toplamağa devam etemiz", — dep ayttı Bariyev.
İşğal etilgen Qırımda "devlet hainligi" (18 adise) ve "casuslıq" (1 adise) kibi qanunsız qabaatlavlar boyunca tutulğanlarnıñ sayısı arta.
"Aşırıcılıq" aqqında aytsaq, uquq qorçalayıcılar böyle beş adise qayd etti.
Bundan ğayrı, işğal etilgen Qırım sakinlerine nisbeten "yañı" olğan repressiyalar qayd etildi, dep ayttı Bariyev.
"Bizde, gizlengen benzin maşnası videosını çekken adamnıñ yaqalanğanı aqqında malümat bar, lâkin onıñ nasıl qabaatlavlar altında tutulğanı aqqında malümat yoq. İşğal etilgen topraqlardan kelgen insanlarnıñ, istenilmegen matbuat vastalarına intervyü berip, taqip etilgenleri aqqında bilemiz. Bu 2026 senesi oraq ayında başlandı ve bundan evel böyle bir şey olmadı. Çoqusı allarda bizler işğalcilerniñ bir insannı alıp qaçqanlarını ya da qıdırağanlarını, ya da bir insannı tutıp alğanlarını qayd etemiz, ve olar insannıñ ne yerde olğanını bilmeyler. Ya da ana-babasından birini alıp keteler, balanı ise evge alıp keteler", — dep bildirdi uquq qorçalayıcı.
Bundan ğayrı, işğal etilgen Qırımda esabat müddeti devamında siyasiy mabüslerge qarşı 48 qanunsız üküm, 56 yañı apis cezası qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
