Ukrayinada ilk sefer qırımtatar yemekleri aqqında kitap qırımtatar tilinde çıqacaq. Müellif Olena Soboleva bunı qırımtatar halqınıñ medeniyetini saqlamaq ve populârlaştırmaq içün müim bir vaqia olaraq tanıy.
Oraq ayınıñ 20-nde Facebookta qırımtatar halqınıñ tarihı ve medeniyeti tedqiqatçısı Olena Soboleva bunı bildirdi.
"Menim "Qırımtatar yemekleri" kitabımnıñ yañı neşiri çıqacağına pek quvanam, bu sefer qırımtatar tilinde. Menim içün bu pek müim bir vaqia", — dep yazdı müellif.
Kitap "Їzhak" neşriyatında neşir etildi. Şimdi onıñ evelki satıluvı devam ete. Anda oquyıcılarğa XX asırnıñ başında qırımtatarlarğa has olğan aşlarnen tanış olmağa vade eteler. Kitap 1944 senesi qırımtatar halqınıñ sürgünligi neticesinde halq yemekleriniñ nasıl deñişkenini köstere.
"Ukrayina mustaqilligini ğayrıdan tiklegen soñ 35 yıl devamında qırımtatar yemekleri aqqında qırımtatar tilinde bir kitap daa neşir etilmedi. Bu aş ve tat aqqında degil de, haber saasında bir halqnıñ tarihınıñ ayrı saifeleriniñ yoqluğı aqqında, elbette, pek kederli bir simptom, amma... Niayet böyle bir kitap olacaq! Qırımtatar medeniyetiniñ sesini ğayrıdan tiklev ve quvetleştirüv esnasınıñ bir qısmı olğanımdan pek memnünim", — dep yazdı "Їzhak" neşriyatınıñ tesisçisi Olena Brayçenko.
Hatırlatamız ki, "Eski Aslan Neşriyatı" 5-inci "Qırım inciri" ukrayin-qırımtatar edebiyatı yarışınıñ eñ yahşı eserleri saylanğan "Qırım inciri. Bizimkiler" kitabını anons etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
