Qırım siyasiy mabüsleri ağa-qardaşlar Osman, Seitumer ve Abdulmecit Seitumerov ve olarnıñ dayısı Rustem Seitmemetov Rusiye apishanesinde ağır sağlıq alından şikâyet ettiler.
Abdulmecitniñ apayı Amina Seitumerova bu aqqında haber etti.
Onıñ aqayı Rostov-na-Donu SİZOtaqiqat izolâtorısında buluna, ameliyattan soñ muntazam tibbiy baqıluvğa muhtac, tiz ağrıları, tiş meseleleri, eşken çeke ve esini coya. Onıñ dört tişi endi çıqarıldı, digerleri de tedaviylenmeyip çıqarılır.
Onıñ qardaşı Osman Seitumerov endi bir qaç yıldan berli "Vladimir merkezi" olaraq belli olğan Vladimirniñ 2-nci apishanesinde apis cezasını çekmekte. O, hronik gastrit, astigmatizm ve tişlerniñ bozulması şikâyetlerinen qarşılaşa. Aynı zamanda Seitumer Seitumerov da körme qabiliyeti zayıflaşqanından ve tişleriniñ bozulğanından şikâyet ete.
Ağa-qardaşlarnıñ dayısı Rustem Seitmemetovnıñ yürek ağrısı, basım tüşüvi, bel ve közler meseleleri bar. Şimdi o, Salatavattaki (Başqırtistan Cumhuriyeti) 16-nci tüzetüv müstemlekesinde tutula.
Daa evel Rusiyeniñ Ulyanovsk vilâyetindeki Dimitrovgrad apishanesinde adamnıñ miokard infarktı oldı. 2024 senesiniñ baarinde oña yürek damar stentleri qoyuldı. Tibbiy teşkerüv neticesinde qırımtatar üçünci saqatlıq gruppasına kirsetildi. Seitumerovanıñ qayd etkenine köre, ameliyattan eki yıl keçken soñ da alâmetleri saqlanıla.
Oraq ayınıñ 15-nde Rusiye mahkemesi "Hizb ut-Tahrir davası"nıñ beşinci Bağçasaray gruppasınıñ bütün iştirakçilerini orta küz ayınıñ 14-ne qadar üç ayğa apiste qaldırdı. Olar Abdulmecit Seitumerov, Remzi Nimetulayev, Amethan Umerov, Ruslan Asanov, Eldar Yakubov ve Seidamet Mustafayev.
"Hizb ut-Tahrir davası"nıñ üçünci Bağçasaray gruppası aqqında ne bilemiz
2020 senesi saban ayınıñ 11-nde Bağçasarayda qırımtatarlarnıñ bir qaç evinde tintüvler keçirildi: Enver Mustafayev, Amet Süleymanov, ağa-qardaş Seitumer ve Osman Seitumerovlar, olarnıñ dayısı Rustem Seitmetmetov.
Tutulğanlarnıñ episi 2003 senesinden berli Rusiyede yasaq etilgen "Hizb ut-Tahrir" teşkilâtınıñ azası olğanında qabaatlana. Ukraina toprağında ve dünyanıñ memleketleriniñ çoqusında teşkilât milliy qanunlar seviyesinde sıñırlanmayıp çalışa.
Dava malümatına köre, qabaatlanğanlarnıñ elinde silâ, patlayıcı maddeler, arbiy yedekler yoq edi, olar terror aktını yapmağa planlaştırmay ve başqalarını terror aktlarına çağırmay ediler. Dava malümatlarında Bağçasaray camilerinde diniy ve siyasiy mevzularda muzakerelerniñ audio yazıları bar.
Mayıs ayında "Memorial" uquq qorçalayıcı merkezi dört Qırım sakinin siyasiy mabüs olaraq tanıdı, olar "Hizb ut-Tahrir davası"nıñ üçünci Bağçasaray gruppasınıñ mabüsleri Seitumer Seitumerov, Osman Seitumerov, Amet Süleymanov ve Rustem Seitmetmetov.
2021 senesi orta küz ayınıñ 29-nda Rostov-na-Donudaki Cenübiy bölgeniñ arbiy makemesi ükümlerni qabul etti: Seitumer Seitumerov sert rejimli müstemlekede 17 sene, Osman Seitumerov 14 sene, Amet Süleymanov 12 sene, Rustem Seitmetov 13 senege maküm etildiler. Advokatnıñ bildirgenine köre, maküm etilgenlerniñ episi 3 sene ve 6 ay apishanede keçirmeliler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
