İşğalciler tarafından 13 yılğa mahküm etilgen qırımtatar faali Rustem Seyitmemetov, Salauat şeerinde (Başqurtistan) 16 sanlı tüzetiş müstemlekesinde bulunğan vaqıtta sağlığı bozulğanından şikâyet ete. Bir yıl evel apishane hastahanesinde yürek tutuvı ve aylanma ameliyat keçirgen, amma daa ağırta.
Bu aqta yaqında müstemlekede onı ziyaret etken ömür arqadaşı Zera Zeynetdinova "Qırım birdemligi" cemaat teşkilâtına oraq aynıñ 5-de haber etti.
Genç Kreml mabuısını da qan basımınıñ tüşüvi raatsızlamağa devam ete, dep qoştı Zeynetdinova.
2024 senesi bir qırımtatarğa katarakta diagnozı qoyuldı ve o, saqatlıqnıñ III zümresine tayinlendi. O vaqıttan berli siyasiy mabüsniñ tişleri daa ziyade ağırıp başladı, em de bütün bedeninde qaşınğan teri peyda oldı.
Qarısı aytqanına köre, beş yıllıq apshanede aqaynıñ sağlığı bozulğan ve zayıflaşmağa devam ete.
"13 yılğa azatlıqtan marum etüvi, adaletsizlik ve aqsızlıqtır", — dep qayd etti o.
"Hizb ut-Tahrir davası"nıñ üçünci Bağçasaray gruppası aqqında ne bilemiz
2020 senesi saban ayınıñ 11-nde Bağçasarayda qırımtatarlarnıñ bir qaç evinde tintüvler keçirildi: Enver Mustafayev, Amet Süleymanov, ağa-qardaş Seitumer ve Osman Seitumerovlar, olarnıñ dayısı Rustem Seitmetmetov.
Tutulğanlarnıñ episi 2003 senesinden berli Rusiyede yasaq etilgen "Hizb ut-Tahrir" teşkilâtınıñ azası olğanında qabaatlana. Ukraina toprağında ve dünyanıñ memleketleriniñ çoqusında teşkilât milliy qanunlar seviyesinde sıñırlanmayıp çalışa.
Dava malümatına köre, qabaatlanğanlarnıñ elinde silâ, patlayıcı maddeler, arbiy yedekler yoq edi, olar terror aktını yapmağa planlaştırmay ve başqalarını terror aktlarına çağırmay ediler. Dava malümatlarında Bağçasaray camilerinde diniy ve siyasiy mevzularda muzakerelerniñ audio yazıları bar.
Mayıs ayında "Memorial" uquq qorçalayıcı merkezi dört Qırım sakinin siyasiy mabüs olaraq tanıdı, olar "Hizb ut-Tahrir davası"nıñ üçünci Bağçasaray gruppasınıñ mabüsleri Seitumer Seitumerov, Osman Seitumerov, Amet Süleymanov ve Rustem Seitmetmetov.
2021 senesi orta küz ayınıñ 29-nda Rostov-na-Donudaki Cenübiy bölgeniñ arbiy makemesi ükümlerni qabul etti: Seitumer Seitumerov sert rejimli müstemlekede 17 sene, Osman Seitumerov 14 sene, Amet Süleymanov 12 sene, Rustem Seitmetov 13 senege maküm etildiler. Advokatnıñ bildirgenine köre, maküm etilgenlerniñ episi 3 sene ve 6 ay apishanede keçirmeliler.
Hizb ut-Tahrir – islam siyasiy fırqası. 2003 senesi Rusiyede onı terroristik teşkiyatı kibi tanıdılar, oña ait olğanlarını ise taqip etmege başladılar. İştirakçılarnı "qabarcılıqqa qarşı faaliyetinde" ve "dünyaara hilâfet" degenini teşkil etmege ıntıluvında qabaatlaylar. 2014 senesi Qırımnıñ işğalinden soñ işğalciler zapt etilgen Qırımğa öz qanunnamesiniñ areketini tarqattılar. Böyleliknen, yarımadanıñ işğalinen razı olmaması içün qırımtatarlarına basqısını quvetleştirip, Hizb ut-Tahrir-ge alâqasında qırım musulmanlarnı da qabaatlamağa başladılar.
Telegram, WhatsApp ve Facebookta Suspilne Qırım haberlerine abune oluñız
