İşğal etilgen Qırımnıñ şimalindeki Canköy şeerinde mobil bağ saatlik rejimini kirsettiler. İşğalli memuriyetniñ bildirgenine köre, elektrik teminatınen bağlı meseleler sebebinden, tek sekiz saat devamında stabil bağ temin etilecek.
Rusiyege boysunğan "Qırım içki siyaset nazirligi" bu aqqında haber etti.
Beyan etilgen cedvelge köre, mobil bağ saat 08:00-den 12:00-ge ve saat 14:00-ten 18:00-ge qadar çalışacaq. Şeer sakinleri bu rejimni telefon etmelerini planlaştırğanda, mobil internet qullanğanda ve stabil bağnı talap etken meselelerni çezgende köz ögüne almağa çağıralar.
İşğalli memuriyet sıñırlavlarnıñ müddetini belgilemedi. Aynı zamanda yerli "Canköy Online" internet provayderiniñ internet hızmetiniñ ayrı cedveli derc etildi.
Hatırlatamız ki, sıñırlavşar işğal etilgen Qırımnıñ şimalinde elektrik teminatı devamlı kesilgen soñ kirsetildi. İşğalli akimiyet yarımadanıñ bir qaç şeerinde ve rayonında elektrik energiyasınıñ kesilüvi aqqında haber etken edi, Canköyde ise suv berüv cedveli çalışmaqta.
İlk yaz ayınıñ soñunda işğalli memuriyet yarımadada elektrik energiyası sistemasında bozuluvlar sebebinden fevqulâde vaziyetni ilân etti. O vaqıttan berli Qırımnıñ farqlı rayonlarınıñ sakinleri muntazam sürette elektrik energiyasınıñ kesilüvi ve bunıñnen bağlı astyapınıñ bozuluvı aqqında bildireler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
