Oraq ayınıñ 15-nde Kıyivdeki "Artek" Halqara bala merkezinde Ukraiyna devletçiligi kününi bütün Ukrayinadan 900-den ziyade bala qayd etti. Tedbir devamında "Artek"niñ Qırım tamırlarını hatırladılar ve yarımada işğalden azat etilecek soñ lagerge qaytmağa ümüt etkenlerini bildirdiler.
Suspilne Qırım mühbiri tedbirni ziyaret etti.
Tedbir vaqtında balalar öz ellerinen yaratılğan "Ukrayina devletçiligi timsali" 10×9 metr büyükligindeki ve Trızubnı tasvirlegen levhanı taqdim ettiler. Bundan ğayrı, muzıka lageriniñ 630 iştirakçisi Milliy prezident orkestrinen beraber ukrayin, ingliz ve latin tillerinde muzıka eserlerini icra etip, Ukrayina Milliy rekordını qoydı.
Ukrayina Prezidentiniñ tasil, ilim ve sport destegi Prezident Fondınıñ meseleleri vekâletli mesleatçısı Olğa Budnık qayd etti ki, genç nesil devletniñ keleceginde müim rol oynayacaq.
"Ukrayina — biñlerce yıllıq tarihı olğan genç bir devlettir. Mustaqillikniñ ğayrıdan tiklenüvi aman-aman 35 yıl evelsi olıp keçkenini bilemiz, amma Ukrayina devleti daa evel qurulğan edi. Bugün yaş nesillerniñ rolü bu devletni ğayrıdan qurmaqta, çünki bizim neslimiz onı qorçalay, siziñ nesilleriñiz ise bugün küreşkenimizni şekillendirecek", — dep ayttı o.
O, balalarnı öz kelecegini Ukrayinanen bağlamağa çağırdı.
"Ukrayinada yaşamağa devam etmekten ğayrı, Qırımğa qaytıp, "Artek" lageriniñ toprağında raatlanacaqmız. Bugün biz, siziñ içün eñ yahşı tasil ve ilim imkânlarını temin etmek içün çalışamız ve Ukrayina bugün siziñ içün açıq olğanını bilmek içün çalışamız. Ukrayinanı saylağanda, onı ne içün saylağanıñıznı bilmek kereksiz — sizni buña zorlağanları içün degil de, yüregiñizniñ istegi olğanı içün", — dep qayd etti o.
Ukrayinada barışıqnıñ fahriy elçisi, Amerika idarecisi Konstantsiya Fortunato, leyhanıñ esas maqsadı ukrayin balalarına qol tutmaq ve olarğa muzıka vastasınen yardım etmek olğanını ayttı.
"Men ğarpnı pek sevdim. Yüregim sevginen tolu. Men bu sebepten mında bulunam. Men qayğıram. Olarğa ümüt bermege isteyim, olarğa dayanıqlılıq bermege isteyim, olar içün dua etken ve qayğırğan, olarnı sevgen diger bir dünya olğanını bilmelerini isteyim. Bu sebepten biz yırlaymız. Çünki muzıka köpürlerni qura. O, divarlarnı yıqa. O, yüreklerimizni birleştirmege imkân bere", — dep qayd etti Fortunato.
O şunı da qayd etti ki, er bir balanıñ muzıka istidatı bar, ocalarnıñ vazifesi ise, onı açmağa yardım etmektir.
"Bu pek büyük bir iş. Bu tılsım degil. Amma eñ müim olğan eki şey bar. Birinciden, men inanam ki, er bir balanıñ içinde muzıka bar. Men, "Oh, muzıkalı ve muzıkasız balalar bar", ya da "Bazıları istidatlı, bazıları ise istidatlı degiller" dap tüşünmeyim. Men buña inanmayım. Men bütün balalarnıñ istidatlı olğanlarına ve er kesniñ muzıkağa qabiliyeti olğanına inanam. Menim vazifem — olarnıñ yüreginde büyüklikniñ tamırları bar olğanını köstermektir. Olarnıñ istidatları bar, ve men olarğa istidatlarını açmağa ve inkişaf ettirmege yardım etecegim, ve olar bunı yapsalar, dünyanı deñiştirirler", — dep qayd etti Fortunato.
Bundan da ğayrı, o, yarımadanıñ Rusiye işğaline qadar Qırım "Artek"inde çalışqanını hatırlattı.
"2008 senesi Serğiy Kapustin meni Qırımdaki "Artek"ke davet etti. Ukrayina rekordları kitabında Qara deñiz yalısında Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) kameral orkestrinen beraber biñlerce öksüz balanen rekord qoydıq. Onıñ içün men "Artek"ni bilem. Biz bunı muzakere ettik, ve o, menim ve taqımımnıñ qaytmasını ister edi", — dep hatırladı o.
Ukrayina prezidentiniñ bala aqları ve bala reabilitatsiyası vekâletli-mesleatçısı Darya Ğerasımçuk tedbir iştirakçilerine muracaat etip, memleketniñ kelecegi içün öz mesüliyetlerini añlamağa çağırdı.
"Balalar olmadan memleketimizniñ kelecegi yoq. Balalar sıq-sıq maña: "Men sadece bala olam, ne yapa bilem?" dep sorağanlar. Ve bugün sizlerge şunı aytmağa isteyim ki, sizden pek çoq şey bağlıdır. Degerli oluñız, er kün memleketimiz, Silâlı quvetlerimiz, arbiy hızmetçilerimiz mustaqilligimiz içün ödeycek fiyatqa lâyıq olmaq içün elinden kelgen er şeyni yapıñız", — dep bildirdi Ğerasımçuk.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
