Siyasiy mabüs Tofik Abdulgazievniñ alı fenalaştı

Qırımtatar siyasiy mabüsi Tofik Abdulazievniñ sağlıq vaziyeti fenalaştı — onıñ şeker seviyesi köterildi, Çelâbinskteki Rusiye apishane hastahanesinde ekimler oña insulin inesini yapıp başladılar. Erkek, küçüni ğayıp olğanı, nefes qıtlığı ve başında bir şey olğanından şikâyet ete. Rusiye mahkemesi, bu yıl çeçek ayında diagnoz qoyulğan miy şişigi sebebinden apisten azat etilmesi içün tekrar berilgen muracaatnı baqmalı.

Siyasiy mabüsniñ apayı Aliye Kurtametova "Qırım birdemligine" bunı bildirdi.

Tofik Abdulgazievniñ sağlığı, oña miy şişigi, tüberküloz ve bir sıra diger ağır hastalıq diagnozı qoyuldı, fenalaşmağa devam ete. Aliye Kurtametova aqayı ile soñki telefon subetinden onıñ şeker seviyesi qara qış ayınıñ soñunda 11 olsa, şimdi 26 oldı. Ekimler oña insulin inelerini yapalar.

"Oña sürekli olaraq aşqazan inelerini yapıla. Biz laf etkende emşire kelip, daa bir ine yaptı. O, küçüniñ ketkenini duya, dep ayta", — dep siyasiy mabüsniñ apayı tarif etti.

Onıñ aytqanına köre, telefonda laf etkende aqayı nefes alıp olamay edi ve çoq vaqıt turıp olamay edi. Onıñ aytqanına köre, onıñ başı devamlı aylana.

"O, başında bir şey olğanını endi duya. Evelleri o bunı is etmey edi, şimdi ise içinden sanki bir topraq sıqışıp tura", — dep aqayınıñ aytqanlarını Aliye Kurtametova bildirdi.

2024 senesi saban ayından başlap qırımtatar Çelâbinskteki 3-nci apis tüberküloz hastahanesinde buluna. 2024 senesi çeçek ayında adamnı intensiv terapiya odasına avuştırdılar ve bir sıra diger ağır hastalıqları qayd etildi. Olarnıñ arasında eki taraflı pnevmoniya, sol taraflı küçük gidrotoraks (yürekte şingenlik), anemiya, mitral klapanınıñ zararlanğan bağlama toqumanıñ displaziyası sendromı (yürek hastalığı), hronik yürek yetmezligi ve gastrit, nefrolitiaz (büyrek taşları) bar.

Abdulgaziyev hastahanege tüşken soñ, onıñ apayı ve adliyecisi, hastalığı sebebinden apis cezasını çekmemege talap ettiler. 2024 senesi arman ayında mahkeme bunı red etti.

2025 senesi kiçik ayda adam qorantasına onıñ alı bayağı fenalaşqanını bildirdi — öksürik ücümleri sıqlaşqan edi, sıcağı devam etken edi. Bundan da ğayrı, musulman sıcaq ve suvuq şaraitte bulunğan apishaneniñ izolâtorına yerleştirildi.

Aynı yılnıñ küzünde Abdulgaziev körme qabiliyetini birden coydı. O vaqıt siyasiy mabüsniñ apayı, aqayınıñ ağır hastalıqtan şikâyet ete edi. İlk qış ayınıñ başında ise, onıñ miyinde şişik peyda oldı. MRT yapılğan soñ, ekimler, ağrı alâmetleri içün teşkerüvler yapılğan soñ, miy şişegi telükeli olğanını qayd etti. O vaqıt adam, bayılıp başlağanını apayına haber etti.

Aliye Kurtametova aqayınıñ azat etilmesini talap ete, çünki hastalıqları cezanı keçirmege imkân bermeycek hastalıqlar cedveline kirsetile. Şimdi Tofik Abdulazievniñ imayecisi mahkemege yañı muracaat yolladı. Hastalıq Rusiye Federatsiyası Ükümetiniñ 54-nci qararına köre, ceza çekmege imkân bermeycek hastalıqlar cedveline kirsetilgen. Toplaşuv bu sene çeçek ayında olacaq.

Tofik Abdulgaziev aqqında ne bilemiz

2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.

2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.

Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.

Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.

Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.

Читати ще