Oraq ayınıñ 13-ne keçer gecesi Ukrayina Mudafaa quvetleriniñ bölükleri Rusiye ordusınıñ bir sıra müim arbiy obyektlerine ücüm etti. Vaqtınca işğal etilgen Qırımda "Nebo-U" radiolokatsiya stantsiyası ve Keriç rayonındaki S-400 raketa kompleksiniñ başlanğıç qurulışı zarar kördi.
USQniñ Baş ştabı bu aqqında haber etti.
Obyektlerniñ zarar miqdarı ve ücüm neticeleri şimdilik belgilenmektedir.
Bundan da ğayrı, ukrayin arbiy hızmetçileri Azaq deñizindeki duşman deñiz logistikanen oğraşqan edi. Baş ştabnıñ malümatına köre, yedi tanker, beş quru yük taşıyıcısı, eki çekici ve bir parom zarar kördi.
Baş ştabnıñ qayd etkenine köre, tankerler Rusiye tarafından halqara sanktsiyalarnı bozıp, cermay ve cermay mahsulatını naqil etmek içün qullanıla, paromlar Rusiye silâlı quvetleriniñ menfaatları içün arbiy logistika ve yük taşuvını temin ete, quru yük gemileri ve çekiciler ise arbiy yük, tehnika, maddiy-tehnikiy vastalar ve Rusiye ordusınıñ deñiz logistika işlevini temin etmek içün qullanıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
