İşğal etilgen Qırımda Kurortne şeerindeki "Ğarbiy-Qırım" elektrik stantsiyasında, Saq şeerindeki elektrik stantsiyası ve demiryol stantsiyası toprağında yanğınlar qayd etildi. Kerç civarındaki Azaq deñizinde belgisiz obyektler yana.
"Qırım yeli", "Exilenova+" nezaret Telegram kanalları ve Ukrayina mudafaa naziriniñ cebede UUAni qullanuvınıñ arttırılması meselesi mesleatçısı Serğiy Sternenko bunı bildirdi.
"Yanğınlar vaqtınca işğal etilgen Qırımnıñ bir qaç rayonında qayd etile: 110 kV "Saq" stantsiyası ve, belki de, demiryol stantsiyası, 330 kV "Ğarbiy-Qırım" stantsiyası, Keriçten şimal deñizde S-400 ZRKniñ belli noqtası rayonında", — dep yazdı Sternenko.
"Exilenova+" ukrayin kanalı bildirdi ki, NASA FIRMS sisteması Keriçniñ şimali, Kurortne, Saq şeerinde yanğınlarnı qayd ete.
"Qırım yeli" Telegram kanalı bildirdi ki, gece patlavlar Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonlarında ve Keriçte yüz berdi.
Olarnıñ malümatına köre, ücüm altında Saq demiryol stantsiyası, "Saq" ve "Ğarbiy-Qırım" elektrik stantsiyaları edi, bundan da ğayrı, keçken gece ukrayin dronları tarafından ücüm etilgen benzin tankerleri yanmağa devam ete edi.
Rusiye Mudafaa nazirligi, Qırım ve Rusiye üzerinde 452 dron tüşürilgenini bildirdi.
Ukrayina arbiy hızmetçileri Qırımğa ücüm aqqında malümatnı resmen tasdıqlamadılar.
İşğalli akimiyet, bugün elektrik kesilgeni sebebinden Yevpatoriyada (Kezlevde) tramvaylar çalışmaycağı, Saq şeerinde ise elektrik ve suv teminlatı yoq olğanını bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
