Rusiyeniñ "Devlet Ermitajı" vaqtınca işğal etilgen Qırımda arheologik ekspeditsiyalarnı belli olmağan müddetke qaldırdı.
TASS Rusiye devlet agentligi Devlet Ermitajınıñ Mirmek arheologik ekspeditsiyasınıñ reberi Oleksandr Butâginniñ malümatına esaslanıp bu aqqında bildire.
"Ekspeditsiyalar, vaziyet eyileşkenine qadar, başqa vaqıtqa qaldırıla. Sebepleri, ğaliba, izaatlamağa kerekmey. Şimdi adiy işni teşkil etmek qıyın", — Butâgin dedi.
O, yarımadada arheologik tedqiqatlar ne vaqıt devam etecegi aqqında aytmadı.
Oleksandr Butâgin kim olğan?
Oleksandr Butâgin — Rusiye arheologı, antikaşınas ve Rusiye Federatsiyasınıñ "Devlet Ermitajı"ndaki Şimaliy Qara deñiz yalısınıñ qadimiy arheologiyası sektorınıñ müdiri. 1999 senesinden başlap o, Qırımdaki Mirmek arheologik ekspeditsiyasınıñ yolbaşçısı edi. İşğal etilgen topraqlarda Ukrayina medeniy degerlikleriniñ hırsızlanmasında iştirak etken şahıslarnıñ cedveline kirsetildi.
2022 senesi Butâgin işğal etilgen Qırımnıñ Keriç civarındaki Mirmekiy qadimiy şeerinde qazma işlerinde Oleksandr Makedonskıy devrine ait 30 para hazinesini taptı, olarnı Rusiyege alıp ketken ediler. Onıñ fiyatı 8,5 million grivnâden ziyadedir. İşğal etilgen Ukrayinada qanunsız çalışqanı içün şübheli olaraq tanıldı.
Qırım Muhtar Cumhuriyetiniñ prokuraturası "Suspilne Qırım" aytqanı kibi, Butâgin — dava açılğan bir qaç arheologlardan biri ola: umumen yedi şübheli, Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında tafsilâtlıca malümatnı maqaleden oquñız.
Rusiye arheologı Oleksandr Butâgin ilk qaş ayınıñ 4-nde Felemenkten Poloniya üzerinden Balkanlarğa ketkende Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokuraturası ögünde ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa işğal etilgen Qırım territoriyasında qanunsız şekilde qazma işlerinen oğraşqanında şübheli sayılıp Varşavada tutulğan Rusiye arheologı Oleksandr Butâginniñ ekstraditsiyası aqqında muracaat yolladı.
Qara qış ayınıñ 12-nde Varşava mahkemesi Rusiye arheologı Oleksandr Butâginniñ apis müddetini saban ayınıñ 4-ne qadar uzattı.
Kiçik aynıñ 10-nda Varşavadaki Apellâtsion mahkemesi Butâginniñ Poloniyada vaqtınca apis etilmesiniñ qanuniyligini tasdıqladı.
Saban ayınıñ 18-nde Varşava okrug mahkemesi işğal etilgen Qırımda qanunsız şekilde qazma işleri yapqanından şübheli sayılğan rusiyeli arheolog Oleksandr Butâginniñ Ukrayinağa ekstraditsiya etilmesi talabını qanaatlendirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
