İşğal etilgen Aqyarda (Sevastopolda) ilk yaz ayı 29-da yanıqnı QR-kodlar boyunca satıp başlaycaqlar, bir maşna içün 20 litr sıñırlanacaq. Aynı zamanda, konteynerlerge benzin qoymağa yasaq ettiler.
Şeerniñ işğalci gubernatorı Mıhaylo Razvojayev Telegramda bu aqqında bildirdi.
"Şahsiy QR-kod, yalıñız bir maşna içün ve yalıñız bu QR-kod kösterilgen soñ, 20 litrlik mahsus marka yaqıtnı satın almağa aqqını bere. Alınğan QR-kodnı saat 09:00 ve 21:00 arasında qullanmaq kerek. QR-kod ile yalıñız maşnağa yaqıt bermege mümkün olacaq, benzinni kanistrlerde satmaq yasaq etile", — o dedi.
Hatırlatamız, işğal etilgen Qırımda sakinler yaqıt qıtlığı, yarıqsızlıq ve bağ bozulması, fiyatlarnıñ köterilmesinen daa sıq qarşılaşalar. Yaqarlıq stantsiyalarında nevbetler saatlernen devam ete, naqliyat alâqaları qısqartıla, insanlar uzun vaqıt yarıq söndürilmesine azırlana. Mallarnıñ kütleviy qıtlığı olmasa da, bazı mallarnıñ fiyatları köterildi.
Düzenli ava telükesi ve patlavlar sebebinden qırımlılar öz evlerinde saqlana ve yañı yaşayış şaraitlerine alışmağa tırışa. Qırımnıñ dört sakini "Suspilne Qırım" saifesinde anonimlik şartları ile tarif ettiler.
Evel FortPost neşiri, Aqyar naqliyat şirketleri birliginiñ işğalci yolbaşçısı Viktor Rikovnıñ malümatına esaslanıp, işğal etilgen Qırımda benzin qıtlığı sebebinden şeerlerara naqliyat seferleri 80% eksildi, dep bildirgen edi. Rikovnıñ qayd etkenine köre, şimdiki vaqıtta naqliyat şirketleri kerekli olğan yaqarlıqnıñ tek dörtten bir qısmını alalar. Şirketlerniñ bir qısmı öz azbarında çalışmaqta.
İlk yaz ayınıñ 26-ndan itibaren işğal etilgen Qırımda ve Aqyarda fevqulâde vaziyet rejimi üküm sürmekte.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
