Ukrayina mahsus operatsiyalar quvetleri işğal etilgen Qırımdaki Şimaliy-Qırım kanalı üzerinden demiryol köprüniñ bütünley yoq etilgeni aqqında bildirdi.
İlk yaz ayınıñ 23-nde Threadste Mahsus operatsiyalar quvetleri bu aqqında haber berdi.
"Bağışlañız, amma bizim resmiy-acelemiz bar: "Qırımdaki Şimaliy Qırım kanalından demiryol köprü artıq yoq — MOQ". Birincisi ketti", — dep qayd etildi haberde.
Bundan evel, ilk yaz ayınıñ 18-nde ve 19-nda, Ukrayina Mudafaa quvetleri işğal etilgen Qırımnıñ Rozdolne (Şimaliy-Qırım kanalı) ve Vladıslavivka rayonlarında demiryol köpürlerine zarar ketirdi.
Hatırlatamız ki, tünevin Qırımda yarımadada yolcu trenleriniñ areketi toqtatılğanı bildirildi. Rusiyenen bağnıñ başlanğıç ve soñ noqtası Kerç olıp qala.
Bundan ğayrı, Qırım köprü qapatılğanı sebebinden Moskva ve Sankt-Peterburgğa ketken trenler 4,5 saatke, Rusiyeniñ diger şeerlerine ketken trenler 1,5-2 saatke keç kete.
Hatırlatamız ki, ilk yaz ayınıñ 23-ne keçer gecesi İnsansız sistemalar quvetler vaqtınca işğal etilgen topraqlardaki, hususan Qırımdaki, 60 Rusiye obyektine ücüm etti. Maqsadlar arasında Keriç (Qamış Burun) elektrik stantsiyasındaki neft rezervuarları ve Karyerne qasabasındaki "Ğarbiy-Qırım" elektrik stantsiyası bar edi. Bundan da ğayrı, Bagerove meskün yerindeki "Pantsir-S1" ZRTK, Kurortnedeki S-300 ve ZU-23-3 zenit qurulışı, em de Keriçteki "Nebo-U" RLS zarar kördi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
