Ukrayinanıñ Rusiyeniñ naqliyat ve neft astyapılarına ücümleri artıq Rusiye logistikasını boza ve işğal etilgen Qırımdaki yaqarlıq qıtlığını arttıra. Cenkni ögrenüv institutı belley ki, (ISW) Ukrayina yarımadanı izolâtsiya ete ve Rusiye ordularınıñ Keriç keçitinden ketirilgen malzemelerni saqlap qalmaq imkânını coya.
Cenkni ögrenüv institutınıñ (ISW) maruzasında bu aqqında aytıla.
"Ukrayina orduları Keriç boğazından Rusiyege logistikası ve yaqarlıq taşımaq imkânını bermemek içün ücüm kampaniyasını alıp bara. Ukrayinanıñ Rusiye neft ve naqliyat astyapılarına ücümleri artıq Rusiye logistikasını boza, energetik teminatını sıqıştıra ve işğal etilgen Qırımdaki yaqarlıq qıtlığını arttıra. Keriç boğazına ücümler, Rusiye ordusınıñ işğal altındaki cenübiy Ukraiyna üzerinden işğal etilgen Qırımğa esas yerastı alâqa hatlarından faydalanmaq imkânından marum etmek maqsadınen devam etken sistematik ukrayin kampaniyasınıñ bir qısmıdır", — dep qayd etildi ISWnıñ maruzasında.
Tahlilcilerniñ qayd etkenlerine köre, ukrayin orduları Herson vilâyeti ve Qırımdaki Rusiye arbiy-sanayı kompleksi ve energetik astyapılarına 2026 senesi ilk yaz ayında ücümlerini bayağı arttırdı.
"Ukrayina ordusı, Rusiye logistikalarına qarşı ücüm etmek içün, Rusiye AMSava mudafaası sistemasılarına ve radiolokatsiya stantsiyalarına maqsatlı ücümler ete, ve işğal etilgen Qırımda Rusiye ordusınıñ yaqarlıq saqlamaq imkânını coymaq içün, gaz kompressor stantsiyaları kibi çeşit neft astyapılarına ücüm ete. Orta ve uzun mesafeli ukrayin dronlarınıñ ücümleriniñ devam etmesi, eki global yol boyunca Rusiye arbiy hadimleriniñ ve tehnikasınıñ taşnması içün taktiki ve operativ seviyede qoşma meselelerni yarata bilir ve Rusiye yakıtınıñ berilmesini boza bilri", — dep tüşüne İnstitut.
Hatırlatamız ki, 2026 senesi ilk yaz ayınıñ 22-de saat 11:00-de işğalciler Qırımdaki bala lagerleriniñ yerlerini ayırtmasını toqtattılar. Sıñırlavlar ilk küz ayınıñ 1-ne qadar devam etecek. Rusiye Mudafaa nazirliginiñ bildirgenine köre, işğal etilgen "Artek"te balalar evlerine ketirilecek.
İşğal etilgen Qırımdaki yaqarlıq stantsiyalarında ilk yaz ayınıñ 21-nde saba eali ve iş adamları içün benizn berilmesini toqtattılar. Şimdilik benzin ve dizel yaqırlığı tek yarımadanıñ yaşayışını ve havfsızlığını temin etken işğalli hızmetler içün bar.
Ukrayina Mudafaa quvetleriniñ ücümleri sebebinden ilk yaz ayınıñ 22-nden itibaren işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad da) cemaat naqliyatı, tükân ve restoranlarnıñ işi sıñırlana. Deñiz paromı çalışmaycaq, kütleviy tedbirler de lâğu etildi. Şeer tışında elektrik söndürilüvi planlaştırıla bile. Bundan da ğayrı, ilk yaz ayınıñ 22-23 künleri Sevastopolda (Aqyarda) yaqarlıq satılmaycaq.
Cemaat naqliyatı da 05:30-tan 21:00-ge qadar çalışacaq. Paromlar çalışmaycaq, tek yolcu katerleri çalışacaq. Alış-veriş merkezleri, tükânlar ve hipermarketler saat 07:00-den 20:00-ge qadar, qavehane ve cemaat aşayt müessiseleri ise — saat 08:00-den 20:00-ge qadar çalışacaq.
"Soqaq ışıqları çalışmaycaq. Sevastopol (Aqyar — terciman) tışında elektrik ağları yüklengeni sebebinden elektrik energiyasınıñ qullanuvınıñ vaqtınca söndürilüvi planlaştırıla bile", — dep bildirdi Razvojayev.
İlk yaz ayınıñ 21-nde Ukrayina prezidenti Volodımır Zelenskıy Ukrayina quvetleriniñ hususan Qırım köprü rayonları ve işğal etilgen Qırımdaki Rusiye arbiy ve energetik astyapılarına gece ücümleriniñ neticelerini bildirdi.
"Qırım köprüniñ eki tarafındaki obyektler zarar kördi: Krasnodar bölgesinde neft naqil etilmesi içün deñizde logistikası ve Keriçte neft bazası. Bundan ğayrı, dört S-400 radiolokatsiya stantsiyası ve eki "Pantsir" kompleksi zarar kördi", — dep qayd etti o.
Bundan da ğayrı, USQniñ Baş ştabı ilk yaz ayınıñ 21-nde gece Keriçte "TES-Terminal-1" neft terminalınıñ zarar körgenini tasdıqladı. Müessise toprağında yanğın çıqtı, obyektniñ astyapısı yanğınğa oğrağanını bildireler. Terminal Qırımdaki yaqarlıq ve yağ malzemelerini taşuv ve saqlav esas noqtalarından biri ola ve işğalli ordularnıñ ihtiyaclarını temin etmek içün qullanıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
