Ukrayina Silâlı quvetleriniñ İnsansız sistemalar quvetleriniñ komandanı Robert "Madâr" Brovdi işğal etilgen Qırımnıñ "Moskvanı tüşürecegi"ni bildirdi ve bundan soñ daima ava telükesi, qapalı köpür ve yollar, qaranlıq ve gürülti olacağı içün yarımadadaki ukrayinlerden afu soradı. O, arbiy obyektlerden uzaq turmağa ve ukrayin arbiy hızmetçilerinen malümat paylaşmağa çağırdı.
İlk yaz ayınıñ 21-nde o, Facebookta bunı bildirdi.
Onıñ aytqanına köre, Rusiye diktatorı Vladimir Putin Qırımnı, atta "ada" statusında olsa da, soñuna qadar öz trofeyi olaraq saqlaycaq.
Aynı zamanda "Madâr" qayd etti ki, ukrayin arbiy hızmetçileri "tam AMSnıñ tüşürilmesi, flot qalımtılarınıñ yoq etilmesi, [Rusiye flotunıñ] kölge flotusınıñ toqtatılması, bütünley resurs ve logistika yoq etilmesi, turizm defoltı, energetik çöl, naqliyat qapatılmasını ve ilâhre" azırlaylar.
"İşğal etilgen topraqlarda yaşağan ukrayinler, daima telüke, qapalı köpürler/yollar, qaranlıq, tınçsızlıq ve stress içün afu sorayım. Arbiy obyektlerden ve yanğın telükesi olğan er şeyden uzaq turuñız, koorlarnı (koordinatlarnı — muar.) paylaşıñız ve özüñizge eyi baqıñız — "Ptah" ustalıqnen çalışa, amma er sefer orman ep kesilgende terek pıtaqları uçacaq", — dep ayttı İSQniñ komandanı.
Onıñ qayd etkenine köre, yarımadadan 1 million işğalcini çıqarmaq içün başqa bir yol körünmey.
"Qırım Moskvanıñ qoluna tüşecek, bu ruhiy bozuluv noqtasıdır, burnumıznıñ altında Koşçeyniñ inesi saqlanğan. Bütün diktatorlıqlar birden yıqıla, er angi bir örnekni hatırlañız. Bugün Moskva Qırımı "tüşe". Qolu olmağan çanta — ağır yüktir", — dep qayd etti "Madâr".
Ukrayina arbiy hızmetçileri ilk yaz ayınıñ 21-nde gece Keriçte "TES-Terminal-1" neft terminalı ve daa bir sıra arbiy obyektke ücüm etkeni içün işğal etilgen Qırımda elektrik ve suv kesildi. Aynı vaqıtta Keriç tarafından Qırım köprüniñ ögüne çoq maşina toplandı.
Bundan da ğayrı, bugün yerli yaqarlıq stantsiyalarında benzin berilmeycek, dep bildirdi Qırım "başı" Sergey Aksönov.
İlk yaz ayınıñ 21-nde Ukrayina prezidenti Volodımır Zelenskıy Ukryaina quvetleriniñ hususan Qırım köprü rayonları ve işğal etilgen Qırımdaki Rusiye arbiy ve energetik astyapılarına gece ücümleriniñ neticeleri aqqında bildirdi.
"Qırım köprüniñ eki tarafındaki obyektler zarar kördi: Krasnodar bölgesindeki neft naqil etilmesi içün deñiz logistikası ve Keriçteki neft bazası. Bundan ğayrı, dört S-400 radiolokatsiya stantsiyası ve eki "Pantsir" kompleksi zarar kördi", — dep bildirdi o.
USQniñ Baş ştabı, ilk yaz ayınıñ 21-nde gece Keriçte "TES-Terminal-1" neft terminalınıñ zarar körgenini tasdıqladı. Müessise toprağında yanğın çıqtı, obyektniñ astyapıları yanğınğa oğrağanını bildireler. Terminal Qırımdaki yaqarlıq ve yağ malzemelerini taşuv ve saqlavnıñ esas noqtalarından biri ola ve işğalli ordularnıñ ihtiyaclarını temin etmek içün qullanıla.
Bundan ğayrı, Rusiyeniñ Krasnodar ülkesinde "Kavkaz" limanınıñ zarar körmesi qayd etildi. Baş ştab Rusiye arbiy taşımalarında qullanılğan bir sıra demiryol köpürleriniñ bozulğanı aqqında bildirdi.
İSQniñ komandanı Robert "Madâar" Brovdi bildirdi ki, ilk yaz ayınıñ 21-nde gece İnsansız sistemalar quvetleriniñ bölükleri Keriç rayonındaki neft terminalınıñ neft bazasına, Kurortne rayonındaki "Kasta-2E2" ve Keriçte "Nebo-U" radiolokatsiya stantsiyalarına ücüm etti.
Bundan da ğayrı, o, Aromatne, Juravlivka ve Klüçi köylerinde bir qaç gaz kompressor stantsiyasınıñ zarar körgenini bildirdi. Bütün obyektler işğal etilgen Qırımda yerleşken ve İSQniñ malümatına köre, Rusiye ordusınıñ teminat sistemasında qullanılğan edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
