Ukrayina Mudafaa quvetleriniñ işğal etilgen Qırımdaki arbiy obyektlerge yapqan muvafaqiyetli ücümleri sebebinden, daa çoq işğalli memur ve FSB hadimi qorantalarını ve mal-mülklerini yarımadanıñ tışına çıqarmağa azırlana.
İlk yaz ayınıñ 18-nde Telegramda "Ateş" arbiy-partizan areketi bu aqqında haber etti.
Areket agentleriniñ malümatına köre, ilk yaz ayınıñ 21-i tarihı sıq-sıq qayd etile — bu künge qadar insanlarnıñ çoqusı tuvğanlarınıñ köçmesini yekünlemege tırışa. Aynı zamanda şahsiy eşyalarını taşımağa ve çıqışnı teşkil etmege talap arttı.
Partizanlar qayd ettiler ki, bu adımlar, yıllardır ealini Qırımnıñ "tamamen telükesiz" olğanına inandırğanlarnıñ kerçek duyğularını köstere.
"Adiy insanlarnı tınçlıq saqlamağa çağıralar, işğalli qurulışlarnıñ vekilleri ise, özleri ve yaqınları içün çıqış yollarını azırlamağa tırışa. "ATEŞ" Qırımnıñ farqlı qurulışlarından malümat almağa devam ete ve vaziyetni diqqatnen nezaret ete", — dep haberde qayd etildi.
Bundan evel "Ateş" areketi bildirdi ki, işğlli Qırım memuriyetiniñ operativ ştabı ilk yaz ayınıñ 21-nden başlap, yarımadağa Ukrayina mudafaa quvetleriniñ ücümleri ola bilecegi sebebinden, bütün kün boyunca çalışacaq.
Hatırlatamız ki, Ukrayina mudafaa naziri Mıhaylo Fedorov PRESSING YouTube kanalında jurnalist, bloger Serğiy Peyçevnen intervyuda bildirdi ki, ukrayin dronları işğal etilgen Qırımnı izolâtsiya ete, onıñ içün eñ yaqın kelecekte yarımada adağa çevirilecek.
Bundan da ğayrı, ilk yaz ayınıñ 18-de gece Mudafaa quvetleriniñ bölükleri vaqtınca işğal etilgen Qırımnıñ Rozodolnıy rayonında Şimaliy-Qırım kanalından keçken demiryol köprüne ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
