İlk yaz ayınıñ 15-nde Avropa Birligi Qırımnıñ Rusiye Ortodoks Kilisesiniñ işğalli mitropoliti Tihonğa (Georgiy Şevkunovğa) qarşı sanktsiyalar kirsetti.
ABniñ resmiy saytında bu aqqında aytıla.
"Georgiy Şevkunov — Ukrayinağa qarşı Rusiyeniñ silâlı tecavuzını aqlamaq maqsadınen Rusiye teşviqatı ve yañlış malümatnı tarqatmaqta faal rol oynay. Georgiy Şevkunov muntazam sürette Kremlge qol tutqan sahte malümatnı, hususan Ukrayinada "natsizm" aqqında iddialarnı tarqata... Numayışlar, media platformaları, devlet tarafından maliye etilgen medeniy leyhalar vastasınen ve işğal etilgen Qırımda Rusiye ordusı içün para toplayaraq o, Rusiyeniñ arbiy areketlerini teşviq ete ve destek ete", — dep vesiqada qayd etildi.
Metropolit Tihon (Georgiy Şevkunov) 2023 senesi Rusiye Ortodoks Kilisesi Muqaddes Sinodasınıñ qaraınen işğalli Qırım mitropoliyasına yolbaşçılıq etmege başladı. Onı Pskovdan işğal etilgen Qırımğa avuştırdılar. Halqara uquq mütehassısı Boris Babinniñ fikirince, "Qırım mitropoliyası"nıñ yolbaşçısı vazifesinde metropolitniñ peyda oluvı bayağı vaqıt evelden planlaştırılğan edi.
Ukrayina Ortodoks Kilisesiniñ Qırım Yeparhiyasınıñ vekili, Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Qırım mitropoliti Kliment Andriy Şçekun Suspilne Qırımğa bildirdi ki, sabıq mitropolit Lazarnı işten boşatqanlar.
Onıñ aytqanına köre, böyle deñişmelerniñ Rusiyede siyasiy ve kilse içi sebepleri bar. Tihonğa sıq-sıq "Putinniñ papazı" deyler, çünki o, Rusiye prezidentine işana, ve o, patriarh olmağa iddia ete. Moskva patriarhı tahtını zapt etmege istegenler, sanktsiyalarğa oğrağan Qırımğa yollap, tesirli raqipni yoq ettiler, çünki öylece o, sanktsiyalar altına oğray.
Hatırlatamız ki, ilk yaz ayınıñ 15-nde Avropa Birligi Şurası, Qırım ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ Rusiye tarafından qanunsız işğaline cevap olaraq kirsetilgen sanktsiyalarnı uzattı. Olar 2027 senesi ilk yaz ayınıñ 23-üne qadar çalışacaqlar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
