14 yılğa azatlıqtan marum etilgen "Qırım birdemligi" jurnalisti Vilen Temeryanov bir ay tibbiy müessisede yatıp, Rostov-na-Donudaki 1-nci SİZOa qaytarıldı.
Onıñ apayı advokatqa muracaat etip, bunı bildirdi.
Bundan evel Temeryanovnı omuzındaki yañı şişik çıqarmaq içün hastahanege yollağan ediler, amma ameliyat öyle de olmadı. Hastahanede bulunğan vaqıt o, teşkerüvlerden keçti ve kerekli testler keçirildi. Bundan da ğayrı, ekimler yañı peyda olğanlardan biyohimyaviy tedqiq içün malzeme aldılar, lâkin onıñ neticeleri çıqaruv vaqtında azır degil edi.
Qorantasınıñ aytqanına köre, jurnalistke kompyuter tomografiyasını yaptırmaq kerek, onıñ içün onı tekrar hastahanege yollamağa planlaştıralar.
"Hizb ut-Tahir davası"nıñ birinci Canköy gruppası aqqında ne bilemiz
2022 senesi arman ayında Qırımnıñ Canköy rayonındaki evler kütleviy şekilde tintilgen soñ altı qırımtatar adamı tutuldı: Enver Kroş, Vilen Temeryanov, Rinat Aliev, Murat Mustafaev, Seityağa Abbozov ve Edem Bekirov.
Olarnı Hizb ut-Tahrir islâm siyasiy firqasında iştirak etmekte qabaatladılar. Esas "delil" — 2015 senesi camide keçirilgen subetniñ audio yazısıdır. Advokat Emil Kurbedinovnıñ fikirince, onı sekiz seneden soñ FSB arhivlerinden çıqardılar, yani bu seneler devamında qayd etilgen qırımtatarlar cinaiy taqipke oğratılmadı ve "cemiyet içün iç bir telüke teşkil etmediler".
İmayeci, FSB hadimleri Canköylı qırımtatarlarnıñ davasını Ukrainadaki adise-vaqialarnen añlı tarzda "bağlağanını" qayd ete.
"Siyasetçiler, kütleviy haber vastaları ve mahsus hızmetler Ukrainadan idare etilgen "terror merkezi" yoq etilgenini bildirdiler. Bu endi, 2022 senesi kiçik aydan soñ olğan vaqialarnen bağlı ve zamanğa uyğun bir ikâyedir", — dep Kurbedinov "Qırım birdemligi"ne ayttı.
Makeme tahqiqatı vaqtında advokat ve dava iştirakçilerine makeme araştırmasına yollanğan malümatnen tanış olmaq imkânı berilmedi. Bundan da ğayrı, bu vaqıt "terror areketleri" ya da başqa "işkence areketleri" planlaştırılmadı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
