Ukrayinanıñ Qırımdaki Rusiye logistikanı, tehnikanı ve canlı quvetlerine ücümleri Cenüpte cenk areketleriniñ ketişatına tesir ete bile.
İlk yaz ayınıñ 12-nde Amerika cenk taqiqatı institutınıñ maruzasında bu aqqında aytıla.
"Ukrayina 2026 senesi baarde Rusiye logistika, arbiy tehnika ve canlı quvetlerine ücümlerniñ miqyasını ve intensivligini arttıra, bu ise Rusiye ordusınıñ arbiy areketler teatrinde ilerilemesini toqtatıp, Ukrayinanıñ işğal etilgen topraqlarında, hususan Cenübiy Ukrayinada ve işğal etilgen Qırımda Rusiye logistika marşrutlarını boza", — dep haberde aytıla.
Tahlilciler, zarar körgen köpürler ğayrıdan tiklene bile, dep tenbiyeleyler, işğalciler ise tamir işlerini başlattılar.
Hatırlatamız, ilk yaz ayınıñ 13-ne keçer gecesi ukrayin arbiyleri Herson vilâyetinde demiryol yolunı ve ponton keçitini ücüm etti.
Bundan da ğayrı, ilk yaz ayınıñ 13-nde "Suspilne studiyası" efirinde Dmıtro Kotsıbayl adına Birinci ayrı ücüm polkunıñ komandanı Dmıtro "Perun" Filatov Cenübiy Ukraina ordusınıñ nevbetteki ücümini tarif etti.
"Bu gece yañı kirüvler oldı. Neticede daa bir müim naqliyat arteriyası zarar kördi — bu sefer demiryolları. Bundan evel Çonğar ve Ermeni köprülerine ücüm etilgen edi. Bundan soñ Rusiye arbiyleri areketni ğayrıdan tiklemek içün bir qaç ponton keçitini yaptı. Bugün de bu keçitlerden birisini bozdılar", — dep Filatov tarif etti.
Onıñ aytqanına köre, bu işğalciler içün problem oldı. Keriç keçitleri çoq naqliyatnı keçirip olamay, şunıñ içün keçitniñ keçüv qabiliyeti alçaq qala, dep arbiy ayta.
Bundan da ğayrı, ukrain uçaqları işğal etilgen Qırım ve cenübiy Ukrayina arasındaki bağ yollarından biri olğan Çonğar köprüne eki kere ücüm etti.
Arbiy Silâlı quvetlerniñ pilotsız sistemaları quvetleriniñ komandanı Robert Brovdi ("Madâr") bildirdi ki, Ukrayina eñ yaqın vaqıtta işğal etilgen Qırımnı Rusiyeden ayırmağa niyetlene. Onıñ aytqanına köre, Mudafaa quvetleri logistika yollarına ücüm etmege devam ete ve yarımadada Rusiye arbiyleriniñ bulunmasını qıyınlaştıracaq şaraitlerni yarata.
Telegram, WhatsApp, Facebook, TikTok ve YouTubede Suspilne Qırım haberlerine abune oluñı
