İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad da) Lenin soqağındaki kinoteatrde ruslar "Ukrayina" yazısını çıqardılar. İşğalciler yañı adnı daa tüşünip çıqmadılar.
İşğalli Sevastopol (Aqyar) "gubernatorı" Razvojayev bunı bildirdi ve bu, "1854-1855 yılları Sevastopol mudafaası" panorama-müzeyinde olğan yanğınnen bağlı olğanını añlattı.
"Biz daa bir müim, pek timsalli qarar aldıq. Lenin soqağındaki kinoteatr — adiy bir bina degil, bu bizim Sevastopol mudafaa müzeyimizniñ bir qısmıdır. Ve duşman Panorama binasına yapqan vahşiy ücümden soñ, bu kinoteatr artıq "Ukrayina" adını taşıyamaz. Biz pek sabırlı ve tolerant bir halqmız. Biz er şeyge insaniyetnen yanaşmağa tırışamız. Amma bazı şeyler afu etilmey. Tarihımıznı ve halqımıznı yoq etmege tırışqan devletniñ adını müzey fasadında qaldırmaq mümkün degil. Bugünden başlap bu yazılar binada yoq. Levha çıqarıldı. Kinoteatrniñ yañı adını Sevastopollılarnen beraber belgileycekmiz", — dep Razvojayev yazdı.
2026 senesi ilk yaz ayınıñ 11-nde bu kinoteatr böyle körüne. O, Sevastopol merkezinde Lenin soqağı, 35 adresi boyunca yerleşe.
Sevastopoldaki kinoteatrden "Ukrayina" yazısını alıp taşladılar, 2026 senesi ilk yaz ayınıñ 11-nde. Telegram/Развожаєв
Hatırlatamız ki, keçken sene işğalciler Sevastopoldaki (Aqyardaki) musafirhane binasından "Ukrayina" yazısını çıqardılar. 1963 senesinden berli musafirhaneniñ adı böyle edi.
"Bu adım, Rusiye işğal etilgen Qırımnıñ cemaat meydanından Ukrayina aqqında er angi añlamnı silmege tırışqanınıñ daa bir misalidir. Olar soqaqlarnıñ adlarını deñiştireler, abidelerni yıqalar, tarihiy adlarnı deñiştireler, şimdi ise — onlarca yıl devamında şeerniñ bir parçası olğan levhalarnı bile", — dep QRM (Qırımtatar Resurs Merkezi) haberinde qayd etildi.
Merkezniñ mütehassıslarınıñ aytqanlarına köre, böyle areketler işğalcilerniñ ukrayin kimliginden qorqqanını köstere.
"Olar bu topraqnıñ kerçek saipleri aqqında er şeyni ğayıp eteler. Amma, eger de bu harflerni tışarıdan silseñiz, olar "Ukrayina" sözüni insanlarnıñ, tarihnıñ ve medeniyetniñ hatırasından yoq etip olamaycaqlar", — dep QRM yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
