Odesa şeeriniñ Prımorsk rayon mahkemesi, sabıq USQniñ Arbiy deñiz quvetleriniñ komandanınıñ birinci muavini Serğiy Yeliseevni 15 yılğa mahküm etti. Qırım işğal etilgende o, Rusiye tarafına keçti ve ukrayin reberliginiñ emirlerini yerine ketirmege red etti.
İlk yaz ayınıñ 11-nde Ukrayina Baş prokurorınıñ Ofisi bunı bildirdi.
"USQniñ Arbiy deñiz quvetleriniñ komandanınıñ birinci muavini, vitse-admiral Serğiy Yeliseev, ğıyabiy ceetten "vitse-admiral" derecesinden marum etilip, 15 yılğa mahküm etildi. 2014 senesi, Qırım işğali başlağanda, o, Ukraiyna flotunıñ komandanı vazifelerini eda etken edi, amma devlet reberliginiñ emirlerini yerine ketirmege red etti, arbiy antını bozıp, istilâcı devletniñ tarafını tuttı", — dep Baş prokuraturanıñ Ofisinde añlattılar.
Serğiy Yeliseevni devlet hainligi, qaçaqlıq, Ukrayinanıñ topraq bütünligi ve toqunılmamazlığına qast etüv, terroristik teşkilâtta iştirak etüv ve tecavuziy arbiy areketlerniñ alıp barılmasında qabaatlı tanıldı (Ukrayina Ceza qanunnamesiniñ 111-inci maddesiniñ 1-inci qısmı, 408-inci maddesiniñ 1-inci qısmı, 110-ıncı maddesiniñ 3-ünci qısmı, 28-inci maddesiniñ 2-nci qısmı, 258-3 maddesiniñ 1-inci qısmı, 282-nci maddesiniñ 2-nci qısmı, 437-inci maddesiniñ 2-nci qısmı).
"O, devlet hainligi içün mahkeme taqip etilgen ilk Ukrayina flotunıñ baş zabitlerinden biri oldı", — dep müessise qayd ettiler.
Serğiy Yeliseev aqqında ne bilemiz
2014 senesi oraq ayında Rusiye Federatsiyasına hızmetke keçken soñ, Yeliseev Rusiyeniñ Baltik flotunıñ komandanınıñ muavini vazifesine tayinlendi. Bu vazifede o, askerlerniñ arbiy azırlığı içün mesüliyetli edi.
"Rusiye silâlı quvetleriniñ eñ yüksek komandanlıq vazifesini sabıq ukrayin satqın zabit alğan ilk vaqia oldı. 2016 senesi Rusiye Baltik flotunıñ ştabında büyük "temizlev" keçirilgen soñ, 50-den ziyade admiral ve kapitan işten boşatılğan soñ, mahküm etilgen öz vazifesini saqlap qalğan yekâne yüksek komandanlıq hadimi olaraq qaldı", — dep prokurorlıq bildirdi.
Bundan soñ o, Rusiyege açıqtan-açıq qol tuta edi, şu cümleden mayıs ayınıñ 9 kününe bağışlanğan tedbirlerde, evelden alğan ukrayin devlet mukâfatlarınen beraber, Rusiyege uyğunlaştırılğan Rusiye arbiy urbasını kiydi.
Mahküm etilgen Ukrayina, AQŞ, Kanada, Büyük Britaniya, Avropa Birligi ve diger ortaq devletlerniñ sanktsiya cedvellerine kirsetilgen.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
