İlk yaz ayınıñ 10-nda Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda), işğalcilerniñ malümatına köre, bazı yaqarlıq stantsiyalarında benzin satıla. Saat 21-ge qadar QR kodları boyunca er bir maşnağa 20 litr benzin "TES" ağınıñ benzin stantsiyalarında satılacaq. "Atan" ağınıñ daa sekiz yerinde aydayıcılarğa yaqarlıqnı kupon olmadan, amma bir maşnağa 20 litr sıñırlavnen satacaqlar.
İşğalli Sevastopol (Aqyar) "gubernatorı" Razvojayev bunı bildirdi.
İlk yaz ayınıñ 10-nda saat 21:00-ge qadar benzin stantsiyasında ilk yaz ayınıñ 8-nde ve 9-nda Sevastopol (Aqyar) sakinleriniñ yaratqanları QR-kodlar çalışacaq. Qalğanları endi çalışmay, dep Razvojayev qayd etti.
"Eger de bir kod cumaertesi ya da bazar künü gecesi berilse ve bir sebepten onı qullanıp olamasañız — kod artıq lâğu etilgenini unutmañız, ve benzin stantsiyasına barıp, nevbette turmağa acet yoq", — dep o ayttı.
O, nevbette turmazdan evel, internette yaqarlıq olıp-olmağanını teşkermege tevsiye etti. İşğalciler bugün şeerniñ sekiz benzin stantsiyasında A-95 ve A-92 benzin satışını açmağa vade ettiler.
İşğalli uquq qorçalayıcılarnıñ malümatına köre, dolandırıcılar faalleşti. Bildirilgeni kibi, olar Telegram kanallarında fiyatlarnı köterip, benzin kuponlarını satalar.
Turistlerni öz bazalarına celp etmek içün, bazı biznes saipleri reklamağa başlap, benzinni bahşış olaraq bere.
"Qırım reintegratsiyası birligi" Rusiye musafirhaneler platforması TravelLine malümatına esaslanıp, mayısnıñ 24-nden ilk yaz ayınıñ 6-na qadar işğal etilgen Qırımda musafirhanelerniñ rezervasyonları keçken seneniñ aynı müddetine köre 31%ge eksildi, dep bildirdi. Sevastopolda ise 40%ge eksildi. Bu malümatqa köre, Qırım Rusiyeniñ eñ populâr onca turistik noqtasından çıqtı, şimdi ise tek 1,5%-ni teşkil ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
