Vaqtınca işğal etilgen Qırımnıñ "Feodosiya" deñiz terminalı rayonında işğalcilerniñ neft astyapılarına zarar ketirilgeni tasdıqlandı.
USQniñ Baş ştabı bu aqqında haber etti.
Qoşma bilgiler talili neticesinde, "Feodosiya" deñiz neft terminalınıñ yanında 2026 senesi mayıs ayınıñ 30 künü RVS-20000 ve eki RVS-5000 neft rezervuarınıñ bozuluvı tasdıqlandı.
Bundan ğayrı, 2026 senesi ilk yaz ayınıñ 4-5 künleri ukrayin bölükleri bir sıra duşman obyektlerine zarar ketirdi. Hususan, Kamyanske (Zaporijjâ vilâyeti) rayonındaki idare noqtası ve Soledar rayonındaki (Donetsk vilâyeti) komandanlıq-nezaret noqtası zarar kördi.
Ayrı-ayrı olaraq Komar ve Voskresenka (Donetsk vilâyeti) rayonlarında, em de Konovalova ve Yamblukove (Zaporijjâ vilâyeti) rayonlarında duşmannıñ UUAni idare etici noqtalarınıñ zarar körgenleri aqqında haber etile.
Bundan da ğayrı, Rusiye ordusınıñ Mariupol, Şevçenko ve Fedorivka (Donetsk vilâyeti), Promin (Zaporijjâ vilâyeti) ve Juravlövka (Belgorod vilâyeti, Rusiye Federatsiyası) rayonlarında toplanğan canlı quvetlerniñ yerleşken yerleri de ücüm altında qaldı.
Hatırlatamız ki, ilk yaz ayınıñ 4-de gece maalinde USQniñ insansız sistemalar quvetleri işğal etilgen Qırımda Yürkine yanında "Svitlâk" sıñır qaravul gemisiniñ zarar körgenini bildirdi. Anda işğalcilerniñ bulunması sebebinden telükelerniñ yoq etilmesi içün sistematik iş alıp barıla, ve o devam etecek. İlk yaz ayınıñ 5-nde Ukrayina Silâlı quvetleriniñ Arbiy-deñiz quvetleriniñ nutuqçısı Dmıtro Pletençuk bunı bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
