Çerkası vilâyetiniñ Smila şeerinden sanatçı Yuliya Kuçerenko, balalıqta Qırımğa yapılğan seyaatlarınıñ şahsiy hatıralarını zemaneviy sanat leyhalarınen birleştirip, ağda nağış vastasınen unikal cılavuq süretlerini ve Qırım manzaralarınıñ resimlerini yarata. Bu numayışlar yarımadanıñ qırımlı qadınınıñ ifade ve duyğusını köstere, em de Rusiye işğali sebebinden anda yaşamaq arzusınıñ timsali ola.
Qırım yarımadası onıñ ayatı ve sanatınıñ bir parçası olğanı aqqında Yuliya Kuçerenko Suspilne Qırımğa tarif etti.
"Bu şekildeki cılavuqlar ağğa tikilgen resimler — dünyada bir olğan müellifniñ ikâyesidir. Yani bu menim uydurğanımdır, böyle bir şey menim başıma kelmedi", — dep sanatkâr añlattı.
Qırımnıñ Rusiye işğali vaqtında olarnı yaratmaq ğayesi peyda oldı.
"2014 senesi qara qış ayında menim bala yataq odamnıñ divarında bir cılavuq resmini çizdim. Men daa 10-uncı ya da 12-nci sınıf talebesi edim. Men de cılavuqlar ve bu kibi geometrik şekillerni çizdim... Cılavuqlar — bu canlı bir şey, bu nazik bir şey, bu deñiz aqqında bir şeydir. Ve bu geometrik şekiller, sanki olar cılavuqlarnı tutıp almağa tırışalar. Ve tek 11 yıl keçken soñ bu resim aqqında hatırladım. Belki de bir şeyge işanğanını añlayım. 2018-2019 seneleri olarnı nağışlamağa başladım", — dep Yuliya hatırladı.
Qırım onıñ içün balalıqtan "cennet" edi.
"Bu yer Zeminde olğanı, cennet bir yer olğanı ve bu Qırım olğanı içün böyle bir içki bahtım bar", — dep sanatçı ayttı.
Yarımadağa ilk sefer bir buçuq yaşında barğan edi. Onıñ eñ parlaq hatırlavları dört yaşında olğan yolculıqnen bağlı. Eñ sevgen yeri Yaltadaki "Masallar tarlası", ayvanat bağçasınıñ yanında edi.
"Şimdi menim bu kibi Masallar vadiyini yaratmaq arzusım bar, amma yalıñız ukrayin masallarınen — Kıyivniñ soqaqlarında", — dep qız qoştı.
2014 senesi Rusiye işğali sebebinden Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte) yaşamaq ve oqumaq arzusı kerçekleşmedi.
"Men bu ğayeni öyle terenlikke kömdim ki, soñra bir uçurım, qaranlıq peyda oldı", — dep Kuçerenko ayttı.
2023 senesi o, "United24" dünya boyunca Ukrayinağa qol tutuv hayriye platformasınıñ koordinatorı Yaroslava Ğres içün ilk Qırım manzarasını yarattı.
"Bu eserniñ yaratılması esnası Qırım manzaraları kollektsiyasınıñ yaratılmasına yol açtı. Çünki men müşterilerime, — bu pek meşur bir insan, — deyim: "Baqıñız, men yañı yaratıcılıq tarzımnı taptım". O da: "Onı tapqanıñdan eminsiñmi? Sen onı qıdırmağan ediñ. Sanki içindeki bir şeyni taptıñ, o da seniñ bir qısmı, ve onı yaratmaq kereksiñ". Böylece Qırım kollektsiyası peyda oldı", — dep o añlattı.
Bir buçuq yıl evelsi Yuliya öz ustahanesini açtı, anda yaratıp, başqalarnı ögrete.
"Bu, yaratıcılıq, derslik, er şey içün yerimdir. Mında men cılavuq nağış etem, ustalıq dersleri berem, Qırım manzaralarınıñ resimlerini yapam... Bu bir qaç yıl evelsi yapılğan eserler. Çoqusı fotolardan yapılğan. Amma men bu yerlerniñ episinde bulunıp, olarnı kördim ve is ettim. Onıñ içün olar pek teren. Ve bu menim Qırımnıñ ifadesi ve duyğusı", — dep o ayttı.
Şimdi Kuçerenkonıñ ayatında "pek çoq Qırım" bar. Şu cümleden, "Qırımterapiya" adlı sanat terapiyası leyhası bar.
"Meni qadınlarğa: qırımtatarlarğa, köçip kelgenlerge ögretmege davet ettiler. Bu ve cam resimleri, ve bir qaç başqa mevzuda usta dersleri olacaq. Qırımtatarlarnıñ bütün vaqiaları menim kerçekligimniñ, haber alanımnıñ bir qısmı oldı. Ve men mında olğanımdan, bu insanlarnen qonuşqanımdan, olarnen olğanımdan pek memnünim. Çünki olar maña pek yaqınlardır. Ve men Qırım qaytarılacağına pek işanam. Men bilem ki, anda da insanlar Ukrayina qaytacağına işanalar", — dep Yuliya qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
