İşğalli Qırım prokurorlığı Rusiyeniñ Rostov-na-Donu şeerindeki Cenübiy bölge arbiy mahkemesine "devlet hainligi" ve "terrorizmge çağıruvlar"da qabaatlanğan yerli sakinge qarşı cinaiy davanı berdi.
"Prokurorlıq" ilk yaz ayınıñ 1-de Telegram kanalında bunı bildirdi.
"2023 senesi çiçek ayında qabaatlanğan şahıs Ukrayina Mudafaa nazirliginiñ Baş istihbarat idaresiniñ hadimine silâlı mudafaa vastaları, Qara deñiz flotunıñ hadimleri, arbiy ve vatandaş obyektleriniñ bulunğan yerleri aqqında fotoresimler ve video malümatını toplap berdi", — dep haberde qayd etildi.
Prokurorlıq iddia etti ki, bu malümat "memleket telükesizligine qarşı" qullanıla bile. Onıñ bildirgenine köre, Qırım sakini içtimaiy ağlarda "terror faaliyetine çağıruvlar" yazğan edi.
Çiçek ayında "Tribunal. Qırım epizodı" teşebbüsiniñ aq qorçalayıcıları Qırımda quvetçilerniñ Ukrayina tarafdarı olğan insanlarğa qarşı taqiplerge yanaşuvınıñ deñişkenine diqqat ayırdılar. 2025 senesiniñ yazından başlap işğal etilgen yarımadada "aşırıcılıq" ve "terrorizm teşviqatı"nen bağlı uydurılğan cinaiy davalarnıñ sayısı bayağı arttı. 2026 senesi çiçek ayınıñ başında biri belli oldı. Söz Ğlib Malkov aqqında kete.
Çiçek ayında Ukrayina uquq qorçalayıcıları Rusiye Federatsiyasınıñ Rostov vilâyeti prokurorlığınıñ prokurorına birinci kere ğıyabiy şekilde cenk qanunlarını ve adetlerini bozğanında şübe bildirdiler, dep QMC prokurorlığı haber etti. O, işğal etilgen Qırımnıñ yalısında esir alınğan Ukrayina Mudafaa nazirliginiñ Bİİ askerini "terrorizm" sebebinden cezalamağa talap etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
