Mayısnıñ 31-nde Kıyiv vaqtına köre saat 19:08-de Qara deñizde işğal etilgen Qırımnıñ yalısı yanında Rihter cedveline köre 3,3 magnitudalı zelzele oldı.
Milliy seysmik közetüv sistemasınıñ Mahsus nezaret baş merkezi (MNBM) bu aqqında haber etti.
Onıñ malümatına köre, zelzele merkezi yalıdan 15 km uzaqlıqta, Sevastopolğa (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ğa) yaqın, 10 km terenlikte yerleşken.
Mütehassıslarnıñ tasniflerine köre, zelzele az duyulğan kategoriyağa kire. Menba koordinatları: 44,47° şimaliy enlik, 33,25° şarqiy boyluq.
Qara deñizde mayısnıñ 3-de tahminen saat 05:48-de 1,5 magnitudalı zelzele 7,5 km terenlikte qayd etildi, dep Avropa Aq deñiz seysmologik merkezi bildirdi. Mayısnıñ 1-de saat 23:26-da işğal etilgen Keriç civarında 2,9 magnitudalı zelzele oldı.
Suspilne Qırım muarririyeti evelden Qara deñiz bölgesinde yañı küçlü zelzele telükesi ne qadar ciddiy olğanını ve yarımada içün ne aqibetleri ola bilecegini ögrendi.
Ukrayina Arbiy-deñiz quvetleriniñ yedek 1-inci derece kapitanı Andriy Rıjenko qayd etti ki, küçlü zelzeleniñ merkezi deñizde olsa, Qırım köprü de telüke altında qala bile.
"Qırım köprü qurulğanda, ve tarih bayağı uzun edi, bu esnasnı toqtatqan esas faktor — tam bir zelzele ihtimali edi. Ve, misal içün, almanlar Ekinci cian cenki vaqtında temeli qoyulğanda, olar tam bu sebepten vazgeçtiler", — dep o qayd etti.
Qırımdan ğayrı, Karpatlar Ukrayinanıñ seysmik faal bölgesi olıp qala. Geofizik institutı qayd ete ki, mevcut doquz seysmologik stantsiyağa Mıkolayiv ve Odesa vilâyetlerinde yañı stantsiyalarnı qoşmağa planlaştırıla. Bu, Qırım yarımadasına tesir ete bilecek yerastı sarsıntılarını daa yahşı taqip etmege imkân berecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
