Ukrayina dronları qıtanı işğal etilgen Qırımnen bağlağan R-280 Mariupol-Melitopol-Simferopol (Aqmescit) trassasında Rusiye arbiy tehnikalarına ücüm etti. Ruslar vatandaş naqliyatınıñ areketini sıñırlamağa mecbur, arbiy naqliyatnı ise gizleyler.
Arbiy mütehassıs İvan Stupak Suspilne Qırımğa bu aqqında tarif etti.
"Ebet, bu yol, bu bağlamalar bizim nezaretimiz altında, amma tam nezaretimiz altında degil. Bugün, yarın, soñra toqtata bilirmiz, amma bağlamalar devam ete. Rusiye içün bu bir lotereya kibi. Atlasañ — atlamasañ. Bugün tınç, yarın tınç, kelecek afta tınç, soñra — er kün yanğan tehnika olur ki, işke çıqmağa istemezsiñ. Yani şimdilik bu bir lotereya kibi", — dep mütehassıs ayttı.
Onıñ aytqanına köre, ukrayin ordusı bu yerde "Hornet" dronları sayesinde ruslardan üstün çıqtı. Bir yıl evelsi Kıyivde Google şirketiniñ sabıq icra müdiri Eric Schmidt, prezident Zelenskıy ile "Swift Beat" şirketinden memorandum imzaladı.
"Ve işte o vaqıt, menim içün, ciddiy, büyük, devamlı, diqqatlı iş başlandı. O vaqıt tek patlayıcınen uçmayıp, öz başına maqsatnı tanığan, yol köstergen, yerleştirgen ve taqip etken dronlarnı yaratmaq aqqında laf yürsetile edi. Ve körgenimiz, bu "Azov trassası", "Azov alqası"na ücüm etken ve Eric Schmidtniñ şirketini maliye etken ve teşviq etken şey — "Hornet" adlı dronlardır", — dep mütehassıs añlattı.
Bir yıl içinde tehnologiyalar keñişleşti. Şimdi, mütehassısnıñ aytqanına köre, bazı rusiye aydavcıları, hususan benzin vagonlarınıñ aydavcıları, bu yoldan keçmege red eteler. Bu sebepten işğalciler arbiy tehnikalarnı gizlemege başladılar.
"Ukrayina UUAleriniñ ücüminden nasıl saqlanmaq mümkün olğanı aqqında hatırlatma peyda oldı — o, nasıl gizlenmek kerek olğanını, yük maşinasına yaqınlaşmamaq, yük maşinasınıñ yanında turmamaq ve ilâhre añlata. Şimdilik Rusiye Federatsiyasında ukrayin ücümlerine qarşılıq köstermek imkânı yoq ve yaqılğan tehnikanıñ sayısı işğal etilgen Qırımda yaqarlıq qıtlığına sebep oldı. Elbette ki, ruslar vaziyetten çıqış yolunı tapacaqlar, barjalar, paromlar, trenler olacaqtır, nasıl olsa da bunı yapacaqlar, amma bu, menimce, köstergiç bir neticesidir", — dep Stupak tüşüne.
Onıñ malümatına köre, bu dronlar 100-160 km mesafe keçe bile. Bundan da ğayrı, operator suniy zekâ sayesinde gizli nişanlarnı tanıy bile.
"Şunıñ içün o, müim dep sayğan noqtalarnı saylay ve operatorğa haber ete. Ve bu ciddiy bir şey, çünki Rusiye Federatsiyasınıñ gizlenüv seviyesi yüksek. Ve hatırlatmaq isteyim ki, Rusiyeniñ eñ yaqın ittifaqdaşları İran ve Şimaliy Koreyadır, ve olar öz tehnikasını pek yahşı gizleyler. Birinciden, UUAlerini uçurğan yük maşinaları. Olarnı vatandaş olaraq köstereler. Adiy mavı renkli maşna, beyaz renkli mögedek. "Rostovkleb" ya da başqa bir şey yaza bile. Ve anda dronlar yerleşe. Ve zemaneviy zekânen donatılğan dronlar, maşna ne qadar sızğanını talil ete bile. O, operatorımızğa ve nomeralarımızğa pek çoq malümat bere. O, 07-17, Çeçenistannıñ 95-inci bölgesini köre bile, ve biz onı daa evel arbiy UAZdan körgen edik, yani — arbiy. Onıñ içün ücüm etemiz", — dep mütehassıs añlattı.
Ukrayina Silâlı quvetleriniñ İnsansız sistemalar quvetleriniñ 412 Nemesis brigadası, Rusiyeniñ cenübiy Ukrayinadaki logistikalarına "kütleviy şekilde avlamağa" başlağanını bildirdi.
"Bunı yapmaq içün, biz daa evel iç bir vaqıt açıq olmağan gizli ücüm etici "qanatlar"nı qullanamız. 412 Nemesis ve istisalcınen sıq işbirlik neticesinde böyle vazifeler içün mükemmelen uyğunlaştırılğan kompleksni yaratmağa imkân oldı. Sistemanıñ semereli çalışqanını onlarnen yoq etilgen rusiye yük maşnası ve yaqarlıq noqtaları isbatlay. Zararlarnıñ miqyası RF komandanlığı ve işğalli akimiyetni ağır tehnikanıñ areketini "Novorossiya" trassasınen sıñırlamağa mecbur etti. Duşmannıñ tarla ve yerastı yollarını qullanmaq ıntıluvları da yaramay ola — ukrayin dronları er türlü topraqtaki maqsatlarnı tapıp yoq ete", — dep haberde qayd etildi.
Hatırlatamız ki, Herson vilâyetiniñ işğal etilgen qısmında işğalli Rusiye akimiyeti Qırımğa yük naqliyatınıñ areketini sıñırladı. Sıñırlamalar "R-280 "Novorossiya" federal yolunıñ "Canköy" keçiş noqtasına doğru" kirsetildi. Herson vilâyetiniñ Rusiye tarafından tayin etilgen "gubernatorı" Vladimir Saldonıñ buyruğında bu aqqında aytıla.
Rusiye ükümeti 2026 senesi Keriç keçitinden işğal etilgen Qırımğa parom yolunıñ inkişafına 5 milliard ruble ayıracaq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
