Mayısnıñ 27-nde gece yedi saat devamında işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad da) ava telükesi bar edi.
Şeerniñ Rusiye kontrolindeki "gubernatorı" Mihail Razvojayev bunı bildirdi.
Onıñ aytqanına köre, Rusiye arbiy hızmetçileri ve mobil ateş gruppaları "birleştirilgen ücüm"ni çeşit ava vastaları, hususan, ilk malümatlarğa köre, Storm Shadow raketaları qullanıp, toqtatqanlar.
Razvojayevniñ sözlerine köre, Şimaliy taraf, Fiolent, Sevastopol (Aqyar) körfezi ve Omega körfezi rayonlarında 20-den ziyade dron tüşürildi. İşğalli akimiyetniñ malümatına köre, yaralanğanlar yoq.
"Krımskiy viyer" Telegram-kanalı, şaatlarnıñ malümatına esaslanıp, Novofedorivka şeeriniñ "Belbek", "Qaçı" ve "Saq" ava limanları rayonlarında patlavlar ve ateş açılğanını bildirdi. Bundan ğayrı, sakinler Sevastopol (Aqyar) körfezi ve Sapun dağı civarındaki duman aqqında yazdılar.
Bundan ğayrı, "Qırım yeli"niñ malümatına köre, Sevastopolda (Aqyarda) Rusiye Qara deñiz flotunıñ ava quvetleri ştabınıñ binasına muvafaqiyetli ücüm qayd etildi. Bu soqaqnıñ bir qısmı naqliyat areketi içün qapatıldı. Bu malümatnıñ resmiy tasdıqlanması şimdilik yoq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
