"Hizb ut-Tahrir davasınıñ" üçünci Canköy gruppasınıñ mabüsi olğan qırımtatarı Ali Mamutovnıñ sağlıq vaziyeti Rusiye SİZOsında bulunğanından soñ fenalaştı. Qorantası oña tibbiy yardım kerek olğanını bildire, amma tahqiqat izolâtorında oña kerekli tedaviylevni bermeyler.
"Qırım birdemligine" siyasiy mabüs Lenar Şeyhislâmovnıñ qadını bu aqqında ikâye etti.
Onıñ aytqanına köre, 50 yaşındaki Ali Mamutovnıñ qan şekeri yükseldi, böyrek taşları peyda oldı, bel ağrısı oldı, em de bayağı kilo berdi. Siyasiy mabüsniñ özü gipertoniya, yürek problemleri ve, onıñ aytqanına köre, apiste bulunğanından berli alğan hepatit C hastalığı aqqında bildirdi.
Qural ay 21-de Rusiye Federatsiyasınıñ Cenübiy okrugınıñ arbiy mahkemesi çıqarğan ükümden soñ, Mamutov, istinaf baqılğanına qadar, Rostov-na-Donu SİZO-1-de qala. Qorantası oña öz başına ilâc bermege tırışa.
Üçünci Canköy "Hizb ut-Tahrir işi" gruppası 2024 senesi saban ayında Qırımnıñ Canköy ve Bağçasaray rayonlarında qırımtatarlarnıñ evlerinde keçirilgen kütleviy tintüvlerden soñ peyda oldı. Rusiye quvetçileri Ali Mamutov, Enver Halilâyev, Remzi Kurtnezerov, Vohid Mustafayev, Nariman Ametov ve digerlerni yaqaladı.
Er kesni Rusiyede yasaqlanğan, amma Ukrayina ve dünyanıñ bir çoq memleketinde qanuniy faaliyet köstergen Hizb ut-Tahrir teşkilâtına alâqası olğanında qabaatladılar. Uquq qoruyıcılar qırımtatarlarğa qarşı davalar siyasiy sebepli olğanını defalarca bildirgen edi.
2026 senesi qural aynıñ 21-nde Rusiye mahkemesi dava mabüslerine üküm çıqardı. Remzi Kurtnezerov 20 yılğa, Nariman Ametov 15 yılğa, Enver Halilâyev 14,5 yılğa, Vohid Mustafayev ve Ali Mamutov 14 yılğa apiske alındı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
