İşğal etilgen Qırımda Aluşta sakinine qarşı "Rusiyeniñ arbiy şan-şüreti timsalleri"ni ve "Vatan qoruyıcılarınıñ hatırasını aqaretlegeni" içün cinaiy dava açıldı (RF Ceza qanunnamesiniñ 354.1-nci maddesiniñ 4-nci qısmı).
Mayısnıñ 20-nde Telegramda Qırım ve Sevastopol (Aqyar) şeerindeki tahqiqat eyyeti bu aqqında haber etti.
"Ayrıca ağır davalar taqiqatı idaresi, Aluşta sakininiñ Rusiyeniñ ilk qış ayınıñ 9-ncı künü — Vatan qaramanları kününiñ timsallerini aqaretlegen, vatanperverlik munasebetinen yayınlanğan, populâr içtimaiy ağda açıq saifesinde tefsirlerni yerleştirgenini ögrendi", — dep haberde qayd etildi.
Şimdi "delil bazası"nıñ pekitilmesi ve cinaiy davanıñ tahqiqatı boyunca "tahqiqat tedbirleri" devam ete. Adamnı qabaatlamağa azırlanalar.
Bundan da ğayrı, mayısnıñ 20-nde işğal etilgen Qırımda eki yerli sakin "devlet hainligi" ve "casuslıq"ta qabaatlanıp mahküm etildi. Erkekke 17 yıllıq, qadınğa 15 yıllıq apis cezası berildi, dep işğalli prokurorlıq bildirdi.
Mayısnıñ başında Ukrayinada ilk sefer işğalli Qırım "mahkeme sisteması"nıñ vatandaşlarğa qarşı qullanılmasını cenk cinayeti olaraq tanığan qarar qabul etildi. Sabıq Qırım "mahkemecisi" 13 yıllıq cezasını aldı, mal-mülki müsade etildi.
Tahqiqat, yarımada işğal etilgen soñ o, Rusiye tarafına keçkenini ve işğalli akimiyet tarafından teşkil etilgen mahkeme organında çalışqanını, vatandaşlarğa Ukrayina tarafını tutqanları içün üküm çıqarğanını isbatladı. Hususan, o, Ahtem Çiygözniñ apis etilmesini devam ettirdi ve Menlik İnqilâbında iştirak etkeni içün faal Oleksandr Kostenkonı mahküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
