İşğal etilgen Qırımda Rusiye yarımadanı işğal etken soñ Ukrayina pasportlarını saqlağan adliyecilerniñ notarial faaliyetini alıp barmaq aqqından marum etmege başladılar. Birinci eki böyle vaqia Yaltada qayd etildi. Şimdi işğalli mahkemede Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) notariusına qarşı daa bir dava baqıla.
TASS Rusiye devlet agentligi bu aqqında yazdı.
2025 senesi ilk küz ayında Rusiye Adalet nazirligi Qırımdan 22 notariusnı statusından, ekinci vatandaşlığı — ukrayin vatandaşlığı olğanı içün, lâğu etmege rica etkenini bildirdi.
İşğal etilgen yarımadada ilk notarial faaliyet aqqından marum etilgenler Yaltalı notariuslar Anatoliy Jeltuhin ve İrına Vısotskadır. Apellâtsiya şikâyetlerini de "mahkeme" red etti. Ruslar olarnı "2014 senesinden soñ ukrayin vesiqalarını resmiyleştirgenleri ve olarnı çetelge çıqqanları içün qullanğanları"nda qabaatlaylar.
"Yalta şeerinden eki notarius notarial faaliyetini alıp barmaq aqqından marum etildi. Bu şahıslar, Adliye nazirliginiñ, statusını lâğu etmege teklif etken, eki vatandaşlı notariuslar cedveline kirgen şahıslardır. Qırım Cumhuriyeti Yuqarı mahkemesiniñ mayısnıñ 6-da notarius Vısotska İrına Yaroslavivna (Yalta), mayısnıñ 12-de notarius Jeltuhin Anatoliy Anatoliyovıç (Yalta) tarafından berilgen istinaf qararı. Bular tek eki vatandaşlı notariuslar degil; olar "Qırım Rusiyege qoşulğan" soñ ukrayin pasportlarını ğayrıdan resmiyleştirdiler ve olarnen beraber çetelge kettiler. Jeltuhin — 2015 senesi, Vısotska — 2016 senesi", — dep TASS yazdı.
Şimdi daa bir şikâyet arizası "Qırım Cumhuriyeti Yuqarı mahkemesi"nde baqıla. Bu, Feodosiya (Kefe) notariusı İğor Kletsniñ notarial faaliyetini alıp barmaq aqqından marum etilmesidir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
