İşğalli Qırım memuriyeti yerli sakinler ukrayin televideniyesine irişip ola bilgen "Gorınıç" adlı uydu antennalarınıñ sayısını teşkermege planlaştıra.
Ukrayina strategik kommunikatsiyalar ve malümat havfsızlığı merkeziniñ (SPRAVDI) saytında bu aqqında aytıla.
"Rusiye Raqamlı inkişaf, bağ ve kütleviy kommunikatsiyalar nazirligine işğal etilgen Qırımda bu kibi donatmalarnıñ qullanuv miqyasını ögrenmek ve "lisenziyasız" uydu donatmalarını teşkermek vazifesi berildi. Rusiye nazirligi iddia ete ki, bu antennalarnıñ qullanılması "kütleviy degil", amma Ukrayinanıñ vaqtınca işğal etilgen topraqlarında bu antennalar sıq qullanılğanını qabul ete", — dep haberde qayd etildi.
Mayısnıñ başında "Kommersant" Rusiye neşiri işbu mevzuda ilân etti ki, işğal etilgen Qırımda bu kibi donatmalarnı yarımada sakinleriniñ üçte biri (34%) qullana. Olarnıñ malümatına köre, çiçek ayınıñ 27-nde Federatsiya Şurasında toplaşuv olıp keçti, onıñ neticesinde yarımadada "Gorınıç" antennalarınıñ ve Rusiye tarafından litsenziyalanmağan servislerniñ sayısını teşkermege qarar alındı. İşğal etilgen Luğansk, Donetsk, Zaporijjâ ve Herson vilâyetlerinde böyle uydu antennaları endi yasaq etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
