İşğal etilgen Qırımda eñ az 21 insan "Yehova şaatları"nıñ diniy inançları sebebinden cinaiy taqipniñ çeşit basamaqlarında buluna. Daa 13 insan Rusiye müstemlekelerinde qanunsız cezalarnı çeke, üçü ise apis cezasını almadan "mahküm etildi".
"Tribunal. Qırım epizodı" aq qorçalayıcı leyhası bu aqqında haber etti.
Mayısnıñ 12-de işğalli Qırım "taqiqat eyyeti" "Yehova şaatları"nıñ daa dört temsilcisini yaqalağanını bildirdi. "Taqiqat"nıñ malümatına köre, erkekler video bağı vastasınen toplaşuvlarnı keçire ve "yasaqlanğan diniy teşkilâtnıñ ğayelerini ileriletmege devam ete".
"Qısqadan aytsaq, olar öz inançlarını ve beraberlikte qılğan dualarını terk etmediler. (...) "Diniy baqışları sebebinden insanlarnı taqip etkeni içün insanlıqqa qarşı cinayetler qabaatlavı boyunca qabaatlanacaq şahıslar cedveline taqiqatçı Anna Romanova qoşula", — dep leyhanıñ haberinde qayd etildi.
Çiçek ayınıñ 28-nde işğalli FSB hadimleri, dini sebebinden mahküm etilgen Viktor Ursunıñ babası Oleksandr Ursunıñ evini tinttiler. Al-azırda 86 yaşındaki Qırım sakini azatlıqtan marum etilmedi ve oña bir yerge ketmege yasaqlandı.
Hatırlatamız ki, diniy sebeplerden taqip etilüv İnsan aqları Avropa konventsiyasınıñ 9-ıncı maddesini boza. Bundan da ğayrı, Ukrayina qanunlarına köre cinayetçi olmağan şahıslarnı taqip etüv — aynı konventsiyanıñ yedinci maddesiniñ bozuluvıdır. Çünki halqara gumanitar uquqına köre, Rusiye işğal etilgen topraqlarda öz cinaiy qanunlarını qullanmağa aqqı yoq.
Ukrayinada Yehova Şaatları Temsilciligi, öz inançlarında iç bir aşırıcı olmağanını yazma cevabında añlattı.
"Dünyanıñ er yerindeki Yehova Şaatları, dindaşlarına yapılğan adaletsiz muameleden pek qasevetleneler, olar içün dua etmege ve qorantalarına qol tutmağa devam eteler... Bütün dünya boyunca Yehova Şaatlarınıñ 100 yıldan ziyade devam etken zemaneviy tarihı, bizler qabul etken Hristianlıqnıñ aşırıcılıq olmağanını isbatlay".
2017 senesi çiçek ayında Rusiye Yuqarı mahkemesi "Yehova şaatları"nı aşırıcı teşkilât olaraq tanıp, olarnıñ faaliyetini Rusiye toprağında ve hususan işğal etilgen Qırımda yasaq etti. Aynı yılnıñ ilk yaz ayında işğalli akimiyet "Yehova şaatları"nıñ bütün cemiyetlerini qayd etmegen edi. Ekinciden, işğalciler cinaiy davalarnı açmağa başladılar. Rusiye qanunlarına binaen, aşırıcı faaliyet içün cinaiy ceza bere
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
