Mayısnıñ 12-de Ukrayina Yuqarı Şurasında 1944 senesi qırımtatar sürgünliginiñ yıllığına bağışlanğan "Tünevin mahküm etilmese edi, bugün etilir" sergisi açıldı. Ekspozitsiya sovet rejiminiñ cinayetini hatırlatmaq ve Rusiyeniñ Qırımğa nisbeten şimdiki siyasetinen qıyaslamaq maqsadınen teşkil etildi.
Facebookta Qırımtatar resurd merkezi (QRM) bu aqqında haber etti.
Ekspozitsiya ukrayin ressamı Andriy Yermolenkonıñ 17 eserinden ibaret.
"Serginiñ maqsadı — ukrayin cemiyetine ve halqara toplulıqqa 1944 senesi qırımtatar halqınıñ sürgünligi genotsid cinayeti olaraq tanılğanını hatırlatmaq, em de sovet rejiminiñ cinayetleri ve Rusiye Federatsiyasınıñ qırımtatar halqına ve bütün ukrayin halqına nisbeten şimdiki siyaseti arasında paralellerni köstermektir", — dep haberde qayd etildi.
Qırımtatar Milliy Meclisiniñ reisi Refat Çubarov açılışta qayd etti ki, bu sergi tek tarihiy hatıra degil de, zemaneviy dünya içün bir ihtar ola.
"Bu sergi tek 1944 senenesi faciasınıñ hatırlavı degil de, cezasız qalğan yamanlıqnıñ qaytarıluvı aqqında bir ikâye. O, keçmiş ve şimdiki zaman arasında bağ aqqında ayta, keregi kibi mahküm etilmegen cinayetler tekrarlana bile", — dep Çubarov qayd etti.
Ukrayina Yuqarı Şurasınıñ reisi Ruslan Stefançuk qayd etti ki, qırımtatar halqınıñ sürgünligi Rusiyeniñ çoq yıllıq cezasızlığı içün daa bir delil oldı.
"Ceza almayıp qalğan cinayet tekrarlana, ceza almayıp qalğan cinayet tekrarlana. Ve bugün bizim vazifemiz — parlament seviyesinde, halqara toplulıq seviyesinde bu cinayetke ceza berilmesi içün er şeyni yapmaq", — dep o qayd etti.
Hatırlatamız ki, 2015 senesi Ukrayina parlamenti qırımtatar halqınıñ sürgünligini genotsid olaraq tanıdı.
"Bugün bizler Ukrayina Yuqarı Şurasınıñ binasında serginiñ açıluvını tesadüfen yapmaymız. Birinciden, Yuqarı Şurağa sürgünlikni genotsid olaraq tanığanına teşekkürler bildirem. Bu qarar ve umumiy sistematik işimiz sayesinde dünyanıñ doquz devleti qırımtatar halqınıñ sürgünligini genotsid olaraq tanıdı", — dep QRMniñ idare reisi Eskender Bariyev qayd etti.
Ukrayina halq mebusı Tamila Taşeva qırımtatar halqınıñ genotsidi mevzusınıñ daimiy halqara imayesi ve Qırımnıñ işğalden qurtarıluvı içün küreşke qol tutmaq müimligini qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
