Rusiye tarafından onı "USQe qol tutqanı içün" devlet hainliginde qabaatlanğan 42 yaşındaki Ukrayina vatandaşı Diana Ğavrılük (Abduraşıtova) davasında mayısnıñ 6-nda mahkeme toplaşuvı olıp keçti.
Onıñ aqayı Andriy Ğavrılük Suspilne Qırım mühbirine bunı ayttı.
Onıñ aytqanına köre, mahkeme tevqif tedbirini 2026 senesi arman ayınıñ 17-ne qadar uzatmağa qarar aldı. Qadın Krasnodar şeeriniñ 1-nci SİZOda buluna.
Hatırlatamız ki, 2025 senesi orta küz ayında Diana Ğavrılük Soçi ava limanında Türkiyeden Qırımğa tibbiy ameliyattan soñ qaytqanda tutuldı. Tutulğan soñ o, Abhaziyağa, soñra ise Borisoglebsk ve Krasnodardaki bir sıra Rusiye tahqiqat izolâtorlarına etap etildi.
Rusiye tarafı onı başta memuriy "boysunmama"da qabaatladı, bundan soñ "devlet hainligi" maddesine istinaden cinaiy dava açıldı. Qorantasınıñ aytqanına köre, bu müddetniñ bir qısmı devamında qadın tış dünyanen bağsız edi, onıñ bulunğan yeri belli degil edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
