14 yıl apis cezasına mahküm etilgen Qırım vatandaş jurnalisti Vilen Temeryanovnı Rostov-na-Donudaki 1-nci SİZOdan hastahanege alıp kettiler, onıñ bulunğan yeri şimdilik belli degil.
Onıñ apayı Elmaz Temeryanova "Qırım birdemligi"ne bunı bildirdi.
Onıñ aytqanına köre, aqayınıñ hastahanege alınğanını onıñ zindandaşlarından biriniñ apayından bildi. Temeryanovnıñ bulunğan yeri belli degil.
"Aqayımnı şişmanlıqtan boşatmaq içün alıp kettiler, dep ayttılar. Men şaştım, çünki bu şişmanlıqnıñ barlığı aqqında iç bir şey bilmey edim", — dep Elmaz Temeryanova tarif etti.
Qadın SİZOğa telefon etip, aqayınıñ bulunğan yerini ögrenmege tırıştı, amma olar malümat bermege red ettiler. Bundan soñ oña hastahanege barmağa tevsiye ettiler. Aynı zamanda, hastahane qayd etti ki, malümatnı tek resmiy talapqa cevap olaraq bere bileler.
"Resmen muracaat etmek ve cevapnı beklemek — bu uzun bir ceryan. Aqayımnıñ çoqtan berli haberleri olmağanı meni qasevetlendire. Eki aftadan berli onıñnen bağımız yoq", — dep onıñ apayı añlattı.
"Hizb ut-Tahir davası"nıñ birinci Canköy gruppası aqqında ne bilemiz
2022 senesi arman ayında Qırımnıñ Canköy rayonındaki evler kütleviy şekilde tintilgen soñ altı qırımtatar adamı tutuldı: Enver Kroş, Vilen Temeryanov, Rinat Aliev, Murat Mustafaev, Seityağa Abbozov ve Edem Bekirov.
Olarnı Hizb ut-Tahrir islâm siyasiy firqasında iştirak etmekte qabaatladılar. Esas "delil" — 2015 senesi camide keçirilgen subetniñ audio yazısıdır. Advokat Emil Kurbedinovnıñ fikirince, onı sekiz seneden soñ FSB arhivlerinden çıqardılar, yani bu seneler devamında qayd etilgen qırımtatarlar cinaiy taqipke oğratılmadı ve "cemiyet içün iç bir telüke teşkil etmediler".
İmayeci, FSB hadimleri Canköylı qırımtatarlarnıñ davasını Ukrainadaki adise-vaqialarnen añlı tarzda "bağlağanını" qayd ete.
"Siyasetçiler, kütleviy haber vastaları ve mahsus hızmetler Ukrainadan idare etilgen "terror merkezi" yoq etilgenini bildirdiler. Bu endi, 2022 senesi kiçik aydan soñ olğan vaqialarnen bağlı ve zamanğa uyğun bir ikâyedir", — dep Kurbedinov "Qırım birdemligi"ne ayttı.
Makeme tahqiqatı vaqtında advokat ve dava iştirakçilerine makeme araştırmasına yollanğan malümatnen tanış olmaq imkânı berilmedi. Bundan da ğayrı, bu vaqıt "terror areketleri" ya da başqa "işkence areketleri" planlaştırılmadı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
