Rusiye quvetçileri bildirdiler ki, çiçek ayınıñ 29-nda işğal etilgen Qırımda "Rusiye Federatsiyasınıñ uquq qorçalayıcı qurulışlarınıñ biriniñ yolbaşçısına qarşı terakt ve yarımadanıñ astyapı obyektlerinde bir qaç diversiya yapmaq niyetinde olğan" bir adamnı tuttılar. Bütün bularnı o, "Ukrayina mahsus hızmetleriniñ emirinen" yapmaq kerek edi.
Rusiye devlet agentligi TASS, Rusiye FSBsine atfı etip, bu aqqında yazdı.
Rusiye kütleviy haber vastalarınıñ bildirgenine köre, tutulğan adam 49 yaşında ve Rusiye vatandaşıdır. Uquq qorçalayıcılarnıñ malümatına köre, o, "uquq qorçalayıcı qurulışlarnıñ birisiniñ yolbaşçısına qarşı terakt ve patlayıcı qullanıp, bir qaç gaz ve elektrik teminlevi obyektinde diversiya yapmaq niyetinde edi".
"Yarımada sakini 2025 senesi Telegram messencerinden celp etildi. Kuratornıñ vazifesine köre o, Qırımdaki arbiy qısımlarnıñ, AMSnıñ, yaqarlıq ve yağ malzemelerinen anbarlarnıñ ve kritik astyapınıñ çeşit obyektleriniñ foto ve videolarını çıqarıp, koordinatlarını kuratorğa yollay edi. Oña qarşı cinaiy davalar 30 maddesi 1-inci qısmı, 205 maddesiterror aktına azırlanuv 3-ünci qısmı, 222.1 maddesiniñ 2-nci patlayıcı maddelerniñ ya da patlayıcı cihazlarnıñ qanunsız satın alınması, berilmesi, saqlanması, taşıması ya da taşımasıqısmı boyunca açıldı. O, bölgeniñ gaz ve elektrik teminlevi obyektlerinde, em de bölgeniñ uquq qorçalayıcı qurulışlarından birisiniñ yüksek seviyedeki yolbaşçısına qarşı diversiya-terroristik areketlerini kerçekleştirmek kerek edi", — dep haberde qayd etildi.
Ukraina tarafı bu "dava"nı izaatlamadı.
Qanunsız tutuv ve "sorğu" videosını RİA Novosti Krımnıñ Telelgramında derc etti.
"Tribunal. Qırım epizodı" uquq qorçalayıcı teşebbüsi qayd etti ki, Rusiye FSBsiniñ versiyasında "mantıq boşluqları" bar.
"Teşviqatçılarnıñ añlamında bir hata bar. Yaqalanğan şahısnıñ başta astyapınıñ obyektlerini, soñra ise generalnı patlatmağa niyetlengenini unutıp, cinayetçi "ücüm maqsadınıñ yaşağan yerini ögrenip, onı gizlemek içün bir usul tapqanını" yazalar. Vazifesini eda etken soñ, o, Rusiye toprağını terk etmek kerek edi, amma onı tuttılar". Bu mantıq zıddiyetleri, Ukrayina mahsus hızmetlerinen işbirlikte qabaatlanğan işğal etilgen topraqlarnıñ sakinlerine qarşı uydurılğan qabaatlavlarnı daa bir kere köstere", — dep uquq qorçalayıcılar eminler.
Bundan evel teşebbüsniñ qayd etkenine köre, Rusiyeniñ Ukrayinağa qarşı cenk başlağanından soñ, Rusiye quvetçileri yerli sakinlerni "devlet hainligi" ya da "diversiya" ya da "teraktlar"da qabaatlap, tutulğanlarnıñ sayısını bayağı arttıra.
"Baarniñ eki ayı içinde bu endi onuncı tevqiftir. Bunıñnen beraber, böyle davalarda qabaatlavlar zorbalıqnen ğayıp oluvdan evel yapıla, mahkemelerde ise, qabaatlav tarafı tarafından berilgen delillerniñ qanuniyligi ve kerçekliginiñ obyektiv qıymet kesilmesine yol bermeycek bir delil yoq", — dep teşebbüs qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
