Ukrayinada qırımtatar tiliniñ inkişafına qoşqan issesine köre Nazirler Kabinetiniñ mukâfatına namzetler belgilendi. Soñki cedvelge 15 namzet kirdi.
Ukrayinanıñ Etnopolitika ve vicdan serbestligi devlet hızmeti (DESS) bu aqqında bildire.
Umumen bu sene 21 namzetniñ muvafaqiyetleri baqıldı. Namzetler arasında maarifçiler, alimler, medeniy erbaplar, media, neşriyat saası, cemaat sektorı ve hayriye teşebbüsleriniñ vekilleri bar.
Saylavda namzetlerniñ iş neticeleri köz ögüne alındı. Hususan, oquv programmalarınıñ, dersliklerniñ ve metodik materiallarnıñ yaratılması, ilmiy tedqiqatlarnıñ keçirilmesi, medeniy ve bediiy leyhalarnıñ ömürge keçirilmesi, qırımtatar tilinde media kontentiniñ yaratılması, kitap ve tercimelerniñ neşir etilmesi, maarif tedbirleriniñ teşkil etilmesi, raqamlı platformalarnıñ inkişafı, em de tasil ve til teşebbüsleriniñ desteklenmesi.
Toplaşuv neticelerine köre, mukâfat berilmesi içün namzetler belgilendi. Nevbetteki basamaq Ukrayina Nazirler Kabinetiniñ qararını azırlamaq olacaq.
Mukâfat laureatları diplom, döş nişanı ve para mukâfatını alacaqlar. Bayraqnen devlet qırımtatar tiliniñ saqlanuvı, inkişafı ve populârlaşmasında müim isse qoşqanlarnı taqdirley.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
